Philemon - Chapter 1

Verse 1: UPawulu, isiboshwa sikaKristu Jesu, noThimothewu umzalwane kuFilemoni, isithandwa sethu nesisebenzi kanye nathi,

Verse 2: naku-Apifiya udadewethu, naku-Arkiphu, ibutho kanye nathi, nakulo ibandla elisendlini yakho:

Verse 3: Makube kini umusa nokuthula okuvela kuNkulunkulu uBaba wethu naseNkosini uJesu Kristu.

Verse 4: Ngibonga uNkulunkulu wami njalo ngikukhumbula emikhulekweni yami,

Verse 5: uma ngizwa ngothando lwakho nokukholwa onakho eNkosini uJesu nakubo bonke abangcwele,

Verse 6: ukuze ukuhlanganyela kokukholwa kwakho kube nomsebenzi ekwazini konke okuhle okukithi kuKristu,

Verse 7: ngokuba nginokuthokoza okukhulu nenduduzo ngothando lwakho, ngokuba izinhliziyo zabangcwele zihlunyelelwe ngawe mzalwane.

Verse 8: Ngalokho noma nginesibindi esikhulu kuKristu sokuba ngikuyale ngakho okufaneleyo,

Verse 9: nokho ngenxa yothando okungcono ngiyancenga, njengokuba nginje mina Pawulu osemdala, manje futhi ngiyisiboshwa sikaKristu Jesu,

Verse 10: ngikuncenga ngomntanami engimzeleyo ekuboshweni kwami, u-Onesimu;

Verse 11: okade engenalusizo kuwe, kepha kalokhu unosizo nakuwe nakimi,

Verse 12: engimbuyisele kuwe, yena oyinhliziyo yami,

Verse 13: ebengifuna ukumbamba ahlale kimi, ukuze angikhonze esikhundleni sakho ngisekuboshweni ngenxa yevangeli;

Verse 14: kepha ngaphandle kokubona kwakho ngangingathandi ukwenza lutho, ukuze umusa wakho ungabi ngokucindezelwa, kodwa ube ngesihle.

Verse 15: Ngokuba mhlawumbe kungenxa yalokho ukuba ahlukaniswe nawe isikhashana, ukuze abe ngowakho kuze kube phakade,

Verse 16: angabi esaba njengesigqila, kodwa abe ngaphezu kwesigqila, engumzalwane othandekayo, kakhulu kimi kepha kakhulu kangakanani kuwe, nasenyameni naseNkosini.

Verse 17: Ngakho uma uthi ngingumhlanganyeli nawe, mamukele ngokungathi yimi.

Verse 18: Kodwa uma ekonile ngento, noma enecala kuwe, lokho kubalele kimi;

Verse 19: mina Pawulu ngikuloba ngesandla sami, ngiyakukukhokha ukuba ngingaze ngisho kuwe ukuthi nawe unecala kimi elinguwe uqobo.

Verse 20: Yebo, mzalwane, mangithokoziswe nguwe eNkosini, uyihlumelele inhliziyo yami kuKristu.

Verse 21: Ngikulobele ngokwethemba ukulalela kwakho, ngazi ukuthi uzakwenza nokungaphezu kwengikushoyo.

Verse 22: Futhi-ke wongilungisela nami indawo; ngokuba ngiyethemba ukuthi ngemikhuleko yenu ngizakuphiwa nina.

Verse 23: Uyakhonza kuwe u-Ephafra oyisiboshwa kanye nami kuKristu Jesu,

Verse 24: noMarku, no-Aristarku, noDema, noLuka, izisebenzi kanye nami.

Verse 25: Umusa weNkosi yethu uJesu Kristu mawube nomoya wenu.