Verse 1: Emva kwalokho uJesu wahamba eGalile, ngokuba wayengathandi ukuhamba eJudiya, lokhu abaJuda bebefuna ukumbulala.
Verse 2: Kwase kusondele umkhosi wabaJuda, owamadokodo.
Verse 3: Base bethi kuye abafowabo: “Muka lapha, uye eJudiya, ukuze nabafundi bakho babone imisebenzi yakho oyenzayo.
Verse 4: Ngokuba akukho muntu owenza utho ekusithekeni, efuna yena uqobo lwakhe abe sobala. Uma wenza lezi zinto, zibonakalise wena kulo izwe.”
Verse 5: Ngokuba nabafowabo babengakholwa nguye.
Verse 6: Ngakho-ke uJesu wathi kubo: “Isikhathi sami asikafiki, isikhathi senu silungile njalo.
Verse 7: Izwe lingenizonde nina, kepha mina liyangizonda, ngokuba ngifakaza ngalo ukuthi imisebenzi yalo mibi.
Verse 8: Yenyukani nina, niye emkhosini; mina angenyukeli manje kulo mkhosi; ngokuba esami isikhathi asikapheleli.”
Verse 9: Eseshilo lokho kubo wahlala eGalile.
Verse 10: Sebenyukele emkhosini abafowabo, naye-ke wenyuka, kungesobala kepha kungathi kungasese.
Verse 11: Khona abaJuda bamfuna emkhosini, bathi: “Uphi yena na?”
Verse 12: Kwaba khona ukukhonona okukhulu ngaye phakathi kwezixuku. Abanye bathi: “Muhle;” abanye bathi: “Qha, ngokuba udukisa abantu.”
Verse 13: Nokho kwakungekho muntu owakhuluma obala ngaye ngokwesaba abaJuda.
Verse 14: Kuthe sekuphakathi komkhosi, uJesu wenyukela ethempelini, wafundisa.
Verse 15: Ngakho abaJuda bamangala bathi: “Lona uyazi kanjani imibhalo engafundanga na?”
Verse 16: Khona uJesu wabaphendula wathi: “Imfundiso yami akusiyo eyami kodwa ngeyongithumileyo.
Verse 17: Uma umuntu ethanda ukwenza intando yakhe, uzakwazi ngemfundiso noma ivela kuNkulunkulu noma ngizikhulumela okwami.
Verse 18: Okhuluma ngokwakhe ufuna udumo lwakhe; kepha ofuna udumo lomthumileyo lowo uqinisile; akukho ukungalungi kuye.
Verse 19: UMose kaninikanga yini umthetho na? Nokho akakho kini ogcina umthetho. Nifunelani ukungibulala na?”
Verse 20: Isixuku saphendula sathi: “Unedemoni wena; ngubani ofuna ukukubulala na?”
Verse 21: UJesu waphendula, wathi kubo: “Munye umsebenzi engiwenzile, niyamangala nonke.
Verse 22: Ngokuba uMose uninikile ukusoka — kungesikho ukuthi kuvela kuMose kodwa kokhokho — niyamsoka umuntu nangesabatha.
Verse 23: Uma umuntu amukela ukusoka ngesabatha ukuze kungeqiwa umthetho kaMose, pho, ningithukuthelela ngokuba ngaphulukisa umuntu ngokuphelele ngesabatha na?
Verse 24: Ningahluleli ngokwamehlo, kepha yahlulelani ukwahlulela okulungileyo.”
Verse 25: Base bethi abanye kwabaseJerusalema: “Lo akusiye yini abafuna ukumbulala na?
Verse 26: Bheka, ukhuluma obala, kabasho lutho kuye. Kungaba ngukuthi ababusi sebazi isibili ukuthi lo unguKristu na?
Verse 27: Kodwa lo siyamazi lapho evela khona; kepha uKristu, nxa efika, akakho owazi lapho evela khona.”
Verse 28: Ngakho uJesu wamemeza efundisa ethempelini, wathi: “Niyangazi, niyazi futhi ukuthi ngivelaphi; mina-ke angizizelanga, kodwa ongithumileyo uqinisile, eningamaziyo nina.
Verse 29: Ngiyamazi mina, ngokuba ngivela kuye, futhi nguye ongithumileyo.”
Verse 30: Ngakho bafuna ukumbamba, kepha akubangakho owambeka isandla, ngokuba isikhathi sakhe sasingakafiki.
Verse 31: Kepha esixukwini abaningi bakholwa nguye, bathi: “UKristu, nxa esefikile, uyakwenza izibonakaliso eziningi kunalezo azenzileyo lona na?”
Verse 32: AbaFarisi bezwa isixuku sikhonona ngalezo zinto ngaye; abapristi abakhulu nabaFarisi base bethuma izikhonzi ukuba zimbambe.
Verse 33: Ngakho-ke uJesu wathi: “Kuseyisikhashana ngikhona kini, besengimuka, ngiye kongithumileyo.
Verse 34: Niyakungifuna, ningangifumani, nalapho ngikhona, ningeze nina.”
Verse 35: Ngakho abaJuda bakhuluma bodwa, bathi: “Uzakuya ngaphi lo lapho singayikumthola na? Uyakuya kwabahlakazekileyo kumaGreki, afundise amaGreki, na?
Verse 36: Lizwi lini leli alishoyo lokuthi: ‘Niyakungifuna, ningangifumani,’ nokuthi: ‘Lapho ngikhona, ningeze nina,’ na?”
Verse 37: Kepha ngosuku lokugcina olukhulu lomkhosi uJesu wema wamemeza wathi: “Uma ekhona owomileyo, akeze kimi, aphuze.
Verse 38: Okholwa yimi, njengokusho kombhalo, esiswini sakhe kuyakugobhoza imifula yamanzi aphilayo.”
Verse 39: Washo lokho ngoMoya abazakumamukela abakholwa nguye, ngokuba uMoya wayengakafiki, lokhu uJesu wayengakakhazimuliswa.
Verse 40: Abanye besixuku sebezwa lawa mazwi bathi: “Lo ungumprofethi isibili.”
Verse 41: Abanye bathi: “Lo unguKristu.” Kepha abanye bathi: “Kanti uKristu uvela eGalile na?
Verse 42: Awushongo yini umbhalo ukuthi uKristu uvela enzalweni kaDavide naseBetlehema, emzaneni lapho wayekhona uDavide na?”
Verse 43: Ngakho kwaba khona ukwahlukana ngaye esixukwini.
Verse 44: Abanye-ke kubo babethanda ukumbamba; kepha akubangakho owambeka izandla.
Verse 45: Zafika-ke izikhonzi kubapristi abakhulu nakubaFarisi. Bathi kuzo: “Animlethanga ngani na?”
Verse 46: Izikhonzi zaphendula zathi: “Akuzange kukhulume muntu njengokuba kukhuluma lowo muntu.”
Verse 47: Ngakho abaFarisi baziphendula bathi: “Kanti nani nidukisiwe na?
Verse 48: Ukhona yini ezikhulwini nakubaFarisi oke wakholwa nguye na?
Verse 49: Kodwa lesi sixuku esingawazi umthetho siqalekisiwe.”
Verse 50: Wayesethi kubo uNikodemu owake weza kuye engomunye wabo:
Verse 51: “Konje umthetho wakithi uyamlahla yini umuntu ungakamuzwa kuqala, uze wazi akwenzayo, na?”
Verse 52: Baphendula, bathi kuye: “Kanti nawe ungowaseGalile na? Phenyisisa, ubone ukuthi akuveli mprofethi eGalile.”
Verse 53: Base behamba, kwaba yilowo nalowo waya ekhaya.