Ephesians - Chapter 5

Verse 1: Ngakho yibani ngabalingisa uNkulunkulu njengabantwana abathandekayo,

Verse 2: nihambe othandweni, njengalokho uKristu wanithanda, wazinikela ngenxa yethu, abe ngumnikelo nomhlatshelo, abe yiphunga elimnandi kuNkulunkulu.

Verse 3: Kepha ubufebe, nakho konke ukungcola, noma isangabe, makungaphathwa nangegama phakathi kwenu, njengokuba kufanele abangcwele,

Verse 4: nehlazo, nokubheda, nokulawula, okuyizinto ezingafanele, kepha kunalokho makube ngukubonga.

Verse 5: Ngokuba yazini lokhu, nikuqonde ukuthi akukho sifebe, noma ongcolileyo, noma onesangabe ongokhonza izithombe, onefa embusweni kaKristu noNkulunkulu.

Verse 6: Masingakhohliswa muntu ngamazwi ayize, ngokuba ngenxa yalezo zinto ulaka lukaNkulunkulu lwehlela phezu kwabantwana bokungalaleli.

Verse 7: Ngakho-ke ningabi ngabahlanganyela nabo.

Verse 8: Ngokuba kade naningubumnyama, kepha manje ningukukhanya eNkosini; hambani njengabantwana bokukhanya,

Verse 9: ngokuba izithelo zokukhanya zisebuhleni bonke nasekulungeni naseqinisweni,

Verse 10: nihlole ukuthi kuyini okuthandeka eNkosini,

Verse 11: ningahlanganyeli imisebenzi yobumnyama engenazithelo, kepha kunalokho niyidalule;

Verse 12: ngokuba okwenziwa yibo ngasese kuyihlazo nokukhuluma ngakho.

Verse 13: Kepha konke okudalulwayo kubonakaliswa ngukukhanya, ngokuba konke okubonakaliswayo kungukukhanya.

Verse 14: Ngalokho uthi: “Phaphama wena oleleyo, uvuke kwabafileyo, uKristu uzakukukhanyisa.”

Verse 15: Ngakho-ke bhekisisani ukuthi nihamba kanjani, kungabi njengabangahlakaniphile kepha njengabahlakaniphileyo,

Verse 16: nithengisise isikhathi, ngokuba izinsuku zimbi.

Verse 17: Ngakho-ke ningabi yiziwula, kodwa qondani okuyintando yeNkosi.

Verse 18: Ningadakwa yiwayini, kuvela kulo umhumheko, kodwa nigcwaliswe ngoMoya,

Verse 19: niphendulane ngamahubo nangezihlabelelo nangamaculo okomoya, nihlabelele, nihubele iNkosi enhliziyweni yenu,

Verse 20: nimbonge njalo uNkulunkulu uYise ngakho konke egameni leNkosi yethu uJesu Kristu,

Verse 21: nithobelane ngokumesaba uKristu.

Verse 22: Abafazi mabathobele amadoda abo kungathi kukuyo iNkosi,

Verse 23: ngokuba indoda iyinhloko yomfazi, njengokuba noKristu uyinhloko yebandla, yena engumsindisi womzimba.

Verse 24: Kepha njengokuba ibandla lithobela uKristu, kanjalo nabafazi mabathobele amadoda ezintweni zonke.

Verse 25: Madoda, thandani omkenu, njengalokho noKristu ulithandile ibandla, wazinikela ngenxa yalo

Verse 26: ukuba alingcwelise, alihlambulule ngesigezo samanzi ngezwi,

Verse 27: ukuze azimisele ibandla elinenkazimulo, lingenasisihla, nambimbi, nanto enjalo, kodwa libe ngcwele lingenacala.

Verse 28: Kanjalo amadoda afanele ukuthanda omkawo njengemizimba yawo. Othanda umkakhe uzithanda yena.

Verse 29: Ngokuba akakho owake wazonda eyakhe inyama, kepha uyayondla, ayiphathe kahle, njengalokhu noKristu enza kulo ibandla;

Verse 30: ngokuba singamalungu omzimba wakhe.

Verse 31: Ngenxa yalokho umuntu uyakushiya uyise nonina, anamathele kumkakhe; labo ababili bayakuba nyamanye.

Verse 32: Le mfihlakalo inkulu, kepha ngikhuluma ngoKristu nebandla.

Verse 33: Nani-ke, yilowo nalowo makathande umkakhe njengokuba ezithanda yena, kepha umfazi makahloniphe indoda yakhe.