Deuteronomy - Chapter 14

Verse 1: “Ningabantwana bakaJehova uNkulunkulu wenu; aniyikuzisika, ningaziphuculi phezu kwamehlo enu ngenxa yabafileyo.

Verse 2: Ngokuba ningabantu abangcwele kuJehova uNkulunkulu wenu; uJehova unikhethile nibe yisizwe senzuzo yakhe ngaphezu kwezizwe zonke ezisebusweni bomhlaba.

Verse 3: “Ungadli into enengekayo.

Verse 4: Nazi izilwane eningazidla: inkomo, nemvu, nembuzi,

Verse 5: nendluzele, nensephe, nenxala, nempala, nempalampala, newula, negogo.

Verse 6: Ningadla nezilwane ezahlukanisa inselo, ezidabula inselo kabili, ezetshisayo kuzo izilwane.

Verse 7: Nokho lezi aniyikuzidla kwezetshisayo nakuzo ezidabula inselo: ikamela, nonogwaja, nembila, ngokuba ziyetshisa, zingahlukanisi kodwa inselo; zingcolile kini;

Verse 8: nengulube, ngokuba iyahlukanisa inselo, ingetshisi kodwa; ingcolile kini; aniyikuyidla inyama yazo, ningathinti izidumbu zazo.

Verse 9: “Lezi ningazidla kuzo zonke ezisemanzini: zonke ezinamaphiko nezingcwecwe;

Verse 10: zonke ezingenamaphiko nazingcwecwe ningezidle; zingcolile kini.

Verse 11: “Ningadla kuzo zonke izinyoni ezihlambulukileyo.

Verse 12: Kodwa yilezi eningayikudla kuzo: ukhozi, nenqe, nengqungqulu,

Verse 13: nesiphungumangathi, noheshe, nonhloyile ngezinhlobo zakhe,

Verse 14: nawo onke amagwababa ngezinhlobo zawo,

Verse 15: nentshe, nenkovana, nenkanku, noklebe ngezinhlobo zakhe,

Verse 16: nesikhova, nomxwagele, nefukezi,

Verse 17: nevuba, nophalane, nomphishamanzi,

Verse 18: nonogolantethe, nonozalizingwenya ngezinhlobo zakhe, noziningweni, nelulwane.

Verse 19: “Nezilwanyana zonke ezinamaphiko zingcolile kini: azinakudliwa.

Verse 20: Kepha ezinyonini zonke ezihlambulukileyo ningadla.

Verse 21: “Aniyikudla lutho lwengcuba; ungamnika umfokazi ophakathi kwamasango akho ukuba akudle, noma uthengise ngakho kowezizwe, ngokuba wena uyisizwe esingcwele kuJehova uNkulunkulu wakho. Awuyikupheka izinyane lembuzi obisini lukanina.

Verse 22: “Uyakunikela ngokweshumi kwazo zonke izithelo zembewu yakho, lokho okuvela ensimini iminyaka ngeminyaka,

Verse 23: ukudle phambi kukaJehova uNkulunkulu wakho endaweni ayakuyikhetha yena ukuba igama lakhe lihlale kuyo, okweshumi kwamabele akho, nokwewayini lakho, nokwamafutha akho, nokwamazibulo ezinkomo zakho, nokwawezimvu zakho, ukuba ufunde ukumesaba uJehova uNkulunkulu wakho njalo.

Verse 24: Uma indlela ikude nawe, ungenamandla okukuthwala, ngokuba ikude kakhulu nawe indawo uJehova uNkulunkulu wakho ayakuyikhetha ukuba alibeke kuyo igama lakhe, lapho uJehova uNkulunkulu wakho ekubusisa,

Verse 25: uyakukwenana ngemali, uyisonge imali esandleni sakho, uye endaweni uJehova uNkulunkulu wakho ayakuyikhetha,

Verse 26: uthenge ngaleyo mali noma intoni umphefumulo wakho oyithandayo, izinkabi, noma izimvu, noma iwayini, noma uphuzo olunamandla, noma intoni umphefumulo wakho oyifunayo, udle khona phambi kukaJehova uNkulunkulu wakho, wename, wena nabendlu yakho;

Verse 27: nomLevi ophakathi kwamasango akho awuyikumeyisa, ngokuba akanasabelo nafa nawe.

Verse 28: “Ngasekugcineni kweminyaka emithathu njalo uyakukhipha konke okweshumi kwezithelo zakho ngawona lowo mnyaka, ukubekelele phakathi kwamasango akho;

Verse 29: nomLevi, lokhu engenasabelo nafa nawe, nomfokazi, nentandane, nomfelokazi, abangaphakathi kwamasango akho, bayakuza, badle, basuthe ukuba uJehova uNkulunkulu wakho akubusise emsebenzini wonke wesandla sakho owenzayo.