Verse 1: Maqondana nomnikelo obuthelwa abangcwele, njengalokho ngayala amabandla aseGalathiya, yenzani kanjalo nani.
Verse 2: Ngosuku lokuqala lweviki akube yilowo nalowo azibekelele eqongelela njengenhlanhla yakhe, ukuze kuthi nxa ngifika, kungabi yikhathi kwenziwa umnikelo.
Verse 3: Ekufikeni kwami labo enibakhethayo ngizakubathuma, bephethe izincwadi, ukuba bayise izipho zenu zothando eJerusalema;
Verse 4: uma kufanele ukuba nami ngihambe, bayakuhamba kanye nami.
Verse 5: Kepha ngiyakuza kini, nxa sengidabulile iMakedoniya; ngokuba ngiyakudabula iMakedoniya;
Verse 6: kepha ngingahle ngihlale isikhathi kini, noma ngidlulise nobusika, ukuze ningiqhube lapho ngisuka ngiya khona.
Verse 7: Ngokuba angizukunibona manje nxa ngidlula; ngokuba ngithemba ukuhlala kini isikhathi, uma iNkosi ivuma.
Verse 8: Kepha ngizakuhlala e-Efesu, kuze kufike iPhentekoste;
Verse 9: ngokuba ngivulelwe umnyango omkhulu wethuba lokusebenza; nabamelene nami baningi.
Verse 10: Kepha nxa kufika uThimothewu, anobheka ukuba ahlale kini engenalo uvalo, ngokuba usebenza umsebenzi weNkosi njengami;
Verse 11: ngakho makungabikho omdelelayo. Nize nimphelekezele endleleni ngokuthula ukuba eze kimi, ngokuba ngimbhekile kanye nabazalwane.
Verse 12: Maqondana nomzalwane u-Apholo, ngamncenga kakhulu ukuba eze kini kanye nabazalwane; kepha kwakungesiyo intando yakhe neze ukuba eze manje; kodwa uyakuza nxa enethuba.
Verse 13: Lindani nigxile ekukholweni, nibe ngamadoda, nibe namandla.
Verse 14: Konke enikwenzayo akwenziwe ngothando.
Verse 15: Ngiyanincenga, bazalwane, niyayazi indlu kaStefana ukuthi ingulibo lwase-Akhaya nokuthi bazimisele ukukhonza abangcwele
Verse 16: ukuba nibathobele abanjalo nabo bonke abasebenzisana nabo bekhandleka.
Verse 17: Ngiyathokoza ngokufika kukaStefana noFortunatu no-Akhayiku, ngokuba bakufezile obekusilele ngakini.
Verse 18: Ngokuba bawuhlumelele umoya wami nowenu; ngakho baziseni abanjalo.
Verse 19: Amabandla ase-Asiya ayakhonza kini. O-Akwila noPriska bakhonza kakhulu kini eNkosini, kanye nebandla elisendlini yabo.
Verse 20: Abazalwane bonke bayakhonza kini. Bingelelanani ngokwanga okungcwele.
Verse 21: Nakhu ukukhonza kwami mina Pawulu ngesandla sami.
Verse 22: Uma umuntu engayithandi iNkosi, makabe ngoqalekisiweyo. Woza, Nkosi!
Verse 23: Umusa weNkosi uJesu mawube nani.
Verse 24: Uthando lwami alube nani nonke kuKristu Jesu.