Verse 1: Wayesethi kubafundi bakhe: “Kungeze kwenzeka ukuba kungaveli izikhubekiso; kodwa maye kulowo ezivela ngaye!
Verse 2: Kungcono kuye ukuba itshe lokusila ligaxwe entanyeni yakhe, alahlwe elwandle, kunokuba akhubekise abe munye kulaba abancinyane.
Verse 3: Xwayani nina. Uma umfowenu ona, mkhuze; uma ephenduka, mthethelele.
Verse 4: Noma ekonela kasikhombisa ngosuku, abuyele kuwe kasikhombisa, ethi: ‘Ngiyaphenduka,’ womthethelela.”
Verse 5: Abaphostoli base bethi eNkosini: “Yandisa ukukholwa kwethu.”
Verse 6: Yayisithi iNkosi: “Uma beninokukholwa okungangenhlamvu yesinaphi, beningasho kulo mthombe: ‘Simbuka, utshaleke elwandle,’ ubuyakunilalela.
Verse 7: “Ngumuphi kini onenceku elimayo nokuba eyalusayo, athi kuyo ibuya endle: ‘Sondela masinyane, uhlale phansi, udle’?
Verse 8: Kodwa akayikusho kuyo ukuthi: ‘Lungisa engizakukudla, uzibophe, ungiphakele, ngize ngidle, ngiphuze, andukuba udle, uphuze wena,’ na?
Verse 9: Uyayibonga yini inceku, ngokuba yenzile ekuyaliweyo na?
Verse 10: Kunjalo nani, nxa nikwenzile konke enikuyaliweyo, anothi: ‘Asizinceku zalutho; sikwenzile nje ebesifanele ukukwenza.’ ”
Verse 11: Kwathi esehamba ukuya eJerusalema, wadabula iSamariya neGalile.
Verse 12: Esangena emzaneni othile, kwahlangana naye amadoda ayishumi anochoko, amela kude,
Verse 13: aphakamisa izwi, athi: “Jesu Nkosi, sihawukele!”
Verse 14: Kuthe ewabona, wathi kuwo: “Hambani, niyoziveza kubapristi.” Kwathi esahamba, ahlanjululwa.
Verse 15: Enye yawo isibona ukuthi iphulukisiwe, yabuya imdumisa uNkulunkulu ngezwi elikhulu,
Verse 16: yawa ngobuso ngasezinyaweni zakhe imbonga; yayingumSamariya.
Verse 17: Kepha uJesu waphendula wathi: “Akuhlanjululwanga abayishumi na? Baphi, pho, abayisishiyagalolunye na?
Verse 18: Abafunyaniswanga yini ababuyela ukumnika uNkulunkulu udumo, kuphela lona wezizwe na?”
Verse 19: Wayesethi kuye: “Sukuma uhambe; ukukholwa kwakho kukusindisile.”
Verse 20: Ebuzwe ngabaFarisi ukuthi umbuso kaNkulunkulu uzakufika nini, wabaphendula wathi: “Umbuso kaNkulunkulu awufiki ubonwa ngamehlo.
Verse 21: Futhi kabayikusho ukuthi: ‘Bhekani, nanku,’ nokuba, ‘nankuya;’ ngokuba bhekani, umbuso kaNkulunkulu uphakathi kini.”
Verse 22: Wayesethi kubafundi bakhe: “Kuzakufika izinsuku, lapho niyakufisa ukubona lube lunye lwezinsuku zeNdodana yomuntu, kepha aniyikulubona.
Verse 23: Bayakuthi kini: ‘Bhekani, nansiya; bhekani, nansi;’ maningayi, ningalandeli.
Verse 24: Ngokuba njengonyazi, nxa lunyazima kwenye indawo phansi kwezulu, lukhanya luze lufike kwenye indawo phansi kwezulu, yoba njalo iNdodana yomuntu ngosuku lwayo.
Verse 25: Kepha kuqala imelwe ukuhlupheka ngokuningi, yaliwe yilesi sizukulwane.
Verse 26: “Njengokuba kwenzeka emihleni kaNowa, kuyakuba njalo nasemihleni yeNdodana yomuntu.
Verse 27: Babedla, bephuza, beganwa, bendiswa, kwaze kwafika usuku uNowa angena ngalo emkhunjini, kwafika uzamcolo, wababhubhisa bonke.
Verse 28: “Kanjalo njengokuba kwenzeka nasemihleni kaLoti, babedla, bephuza, bethenga, bethengisa, betshala, bakha;
Verse 29: kepha ngosuku uLoti aphuma ngalo eSodoma lana umlilo nesibabule kuvela ezulwini, kwababhubhisa bonke;
Verse 30: kuyakuba njalo ngosuku eyakwambulwa ngalo iNdodana yomuntu.
Verse 31: Ngalolo suku oyakuba phezu kwendlu, impahla yakhe isendlini, kangehli ukuyithatha; njalo nosensimini kangabuyeli emuva.
Verse 32: Khumbulani umkaLoti.
Verse 33: Ofuna ukuzuza ukuphila kwakhe uyakulahlekelwa yikho, kepha olahlekelwa yikho uyakukulondoloza.
Verse 34: Ngithi kini: Ngalobo busuku kuyakuba khona ababili embhedeni munye; omunye uyakuthathwa, omunye ashiywe.
Verse 35: Kuyakuba khona ababili besila ndawonye; omunye uyakuthathwa, omunye ashiywe.
Verse 36: Kuyakuba khona ababili ensimini; omunye uyakuthathwa, omunye ashiywe.”
Verse 37: Base bephendula, bethi kuye: “Kuphi, Nkosi?” Wathi kubo: “Lapho kukhona isidumbu, kulapho amanqe eyakubuthana khona.”