Verse 1: umkhosi wesinkwa esingenamvubelo othiwa iPhasika.
Verse 2: Abapristi abakhulu nababhali bafuna ukuba bangambulala kanjani; ngokuba babesaba abantu.
Verse 3: Kepha uSathane wangena kuJuda othiwa u-Iskariyothe engowabayishumi nambili.
Verse 4: Wasuka wakhuluma nabapristi abakhulu nezinduna ngokuthi angamkhaphela kanjani kubo.
Verse 5: Bathokoza, bavumelana naye ukumnika imali.
Verse 6: Wavuma-ke, waze wafuna ithuba lokumkhaphela kubo, singekho isixuku.
Verse 7: Lwase lufika usuku lwesinkwa esingenamvubelo okumelwe ukuba kuhlatshwe ngalo iphasika.
Verse 8: Wathuma oPetru noJohane, wathi: “Hambani niye ukusilungisela iphasika ukuba sidle.”
Verse 9: Bathi kuye: “Uthanda ukuba sikulungiselephi na?”
Verse 10: Wathi kubo: “Bhekani, seningene emzini niyakuhlangana nomuntu othwele imbiza yamanzi; mlandeleni, niye endlini angena kuyo,
Verse 11: nize nithi kumninindlu: ‘Uthi uMfundisi kuwe: Liphi ikamelo lokungenisa, lapho ngingadlela khona iphasika nabafundi bami, na?’
Verse 12: Lowo-ke uzakunikhombisa ikamelo elikhulu eliphezulu, elendlelweyo; lungiselani lapho.”
Verse 13: Basuka, bafumana kunjengokusho kwakhe kubo; base belungisa iphasika.
Verse 14: Kwathi ukuba kufike isikhathi, wahlala phansi, nabaphostoli kanye naye.
Verse 15: Wayesethi kubo: “Nginxanele nokunxanela ukudla nani leli phasika ngingakahlupheki.
Verse 16: Ngokuba ngithi kini: Angisayikulidla ngempela lize ligcwaliseke embusweni kaNkulunkulu.”
Verse 17: Wamukela isitsha, wabonga wathi: “Thabathani lokhu, nabelane;
Verse 18: ngokuba ngithi kini kusukela manje angisayikuphuza okwesithelo somvini, uze ufike umbuso kaNkulunkulu.”
Verse 19: Wayesethabatha isinkwa, wabonga, wasihlephula, wabanika, wathi: “Lokhu kungumzimba wami onikelwa nina; yenzani lokhu ukuba ningikhumbule.”
Verse 20: Kanjalo-ke nesitsha emva kokudla, ethi: “Lesi sitsha siyisivumelwano esisha egazini lami elithululelwa nina.
Verse 21: Kepha bhekani, isandla songikhaphelayo sinami etafuleni.
Verse 22: Ngokuba iNdodana yomuntu isihamba njengokumisiweyo, kepha maye kulowo muntu ekhashelwa ngaye!”
Verse 23: Base beqala ukubuzana bodwa ukuthi kungase kube ngubani kubo ozakukwenza lokho.
Verse 24: Kwavela nokuphikisana phakathi kwabo kokuthi ngumuphi kubo ongathiwa omkhulu.
Verse 25: Wayesethi kubo: “Ababusi bezizwe bazenza amakhosi phezu kwazo, neziphathimandla zazo zithiwa abazenzela okuhle.
Verse 26: Kepha nina aninjalo; kodwa omkhulu kini makabe njengomncinyane, nobusayo makabe njengokhonzayo.
Verse 27: Ngokuba ngumuphi omkhulu, ohlezi ekudleni noma okhonzayo, na? Akusiye ohlezi ekudleni na? Kepha mina ngiphakathi kwenu njengokhonzayo.
Verse 28: Nina-ke ningababekhuthazela nami ekulingweni kwami;
Verse 29: nanjengokuba uBaba engimisele umbuso, nami nginimisela wona
Verse 30: ukuba nidle, niphuze etafuleni lami embusweni wami; niyakuhlala ezihlalweni zobukhosi, nahlulele izizwe eziyishumi nambili zakwa-Israyeli.
Verse 31: “Simoni, Simoni, bheka, uSathane unifunile ukuba anihlunge njengokolweni;
Verse 32: kepha mina ngikunxusele ukuba ukukholwa kwakho kungapheli; wena-ke, nxa usuphendukile, uqinise abafowenu.”
Verse 33: Wathi kuye: “Nkosi, ngilungele ukuya nawe nasetilongweni nasekufeni.”
Verse 34: Wayesethi: “Ngiyakutshela, Petru, ukuthi iqhude aliyikukhala namhlanje, ungakangiphiki kathathu ukuthi awungazi.”
Verse 35: Wathi kubo: “Mhla nginithuma ningenasikhwama, nayika, nazicathulo, naswela utho na?” Bathi: “Lutho.”
Verse 36: Wayesethi kubo: “Kepha manje onesikhwama kasithathe, neyika futhi; oswelayo kathengise ngengubo yakhe, athenge inkemba.
Verse 37: Ngokuba ngithi kini: Kumelwe ukugcwaliseka kimi lokho okulotshiweyo kokuthi: ‘Wabalwa kanye nezelelesi;’ ngokuba okuqondene nami sekuyaphelela.”
Verse 38: Base bethi: “Nkosi, bheka, nazi izinkemba ezimbili.” Wathi kubo: “Kwanele.”
Verse 39: Wayesephuma, waya eNtabeni Yeminqumo njengomkhuba wakhe, nabafundi bakhe bamlandela.
Verse 40: Esefikile endaweni wathi kubo: “Khulekani ukuba ningangeni ekulingweni.”
Verse 41: Wamonyuka kubo kungathi ibanga lokuphonsa itshe, waguqa phansi, wakhuleka,
Verse 42: wathi: “Baba, uma uthanda, susa lesi sitsha kimi; nokho makungenziwa intando yami kodwa eyakho.”
Verse 43: Kwabonakala kuye ingelosi ivela ezulwini, imqinisa.
Verse 44: Esosizini olunzima wakhuleka eqinisela, izithukuthuku zakhe zaba njengamathonsi egazi, aconsela emhlabathini.
Verse 45: Esesukume ekukhulekeni weza kubafundi bakhe, wabafumana belele ngokudabuka.
Verse 46: Wathi kubo: “Nilaleleni na? Vukani nikhuleke ukuba ningangeni ekulingweni.”
Verse 47: Esakhuluma, bheka, kwafika isixuku; naye othiwa uJuda, omunye wabayishumi nambili, wayehamba phambi kwabo, wasondela kuJesu ukumanga.
Verse 48: Kepha uJesu wathi kuye: “Juda, uyayikhaphela iNdodana yomuntu ngokuyanga na?”
Verse 49: Kuthe ababengakuye sebebona okuzakwenzeka, bathi: “Nkosi, sigadle ngenkemba na?”
Verse 50: Omunye othile kubo wayigadla inceku yompristi omkhulu, wayinquma indlebe yokunene.
Verse 51: Kepha uJesu wathatha wathi: “Musani; sekwanele.” Wayiphatha indlebe, wayipholisa.
Verse 52: Wathi uJesu kubapristi abakhulu, nezinduna zethempeli, namalunga ababeze kuye: “Niphumile kungathi nize kumphangi niphethe izinkemba nezinduku.
Verse 53: Benginani imihla ngemihla ethempelini, anelulanga zandla kimi; kepha lokhu kuyihora lenu namandla obumnyama.”
Verse 54: Base bembamba, bamuka naye, bamusa endlini yompristi omkhulu. UPetru walandela ekude.
Verse 55: Sebebasile umlilo phakathi egcekeni bahlala phansi ndawonye; uPetru wahlala phakathi kwabo.
Verse 56: Intombazana ethile, imbona ehlezi ngasemlilweni, yamgqolozela yathi: “Nalona ube naye.”
Verse 57: Kepha waphika, wathi: “Sifazane, angimazi.”
Verse 58: Emva kwesikhashana omunye wambona, wathi: “Nawe ungomunye wabo.” Kepha uPetru wathi: “Muntundini, angisiye.”
Verse 59: Sekudlulile okungathi ihora linye, omunye umuntu waqinisa wathi: “Impela nalona ube naye, ngokuba futhi ungowaseGalile.”
Verse 60: Kepha uPetru wathi: “Muntundini, angikwazi ukuthi uthini.” Masinyane esakhuluma, lakhala iqhude.
Verse 61: INkosi yayisiphenduka, yambheka uPetru. UPetru walikhumbula izwi leNkosi, njengokuba ithe kuye: “Iqhude lingakakhali namhlanje, uzakungiphika kathathu.”
Verse 62: Waphumela phandle, wakhala kamunyu.
Verse 63: Amadoda abembambile uJesu ambhinqa emshaya.
Verse 64: Ammboza ubuso, ambuza ethi: “Profetha ukuthi ngubani okushayileyo na?”
Verse 65: Nokunye okuningi akukhuluma kuye emthuka.
Verse 66: Kwathi sekusile, kwabuthana amalunga abantu nabapristi abakhulu nababhali, bamyisa emphakathini wabo,
Verse 67: bathi: “Uma unguKristu, sitshele.” Wathi kubo: “Uma nginitshela, anisoze nakholwa;
Verse 68: noma ngibuza, anisoze naphendula.
Verse 69: Kepha kusukela manje iNdodana yomuntu izakuhlala ngakwesokunene samandla kaNkulunkulu.”
Verse 70: Base bethi bonke: “Kanti uyiNdodana kaNkulunkulu na?” Wathi kubo: “Nisho khona, ngokuba ngiyiyo.”
Verse 71: Bathi: “Pho, sisaswele bufakazi na? Ngokuba sesizwile uqobo lwethu ngomlomo wakhe.”