Verse 1: kusuka uquqaba lonke, lwamyisa kuPilatu.
Verse 2: Baqala ukumthwesa icala, bathi: “Simfumene lo edukisa isizwe sakithi, enqaba ukuba kuthelwe imali kuKesari, ethi nguye onguKristu inkosi.”
Verse 3: UPilatu wambuza wathi: “Wena uyinkosi yabaJuda na?” Wamphendula wathi: “Usho khona.”
Verse 4: Wayesethi uPilatu kubapristi abakhulu nakuzo izixuku: “Angifumani cala kulo muntu.”
Verse 5: Kwayikhona beqinisa kakhulu, bethi: “Uvusa abantu efundisa kulo lonke laseJudiya, eqalile kwelaseGalile, waze wafika lapha.”
Verse 6: UPilatu esezwa lokho wabuza ukuba lowo muntu ungowaseGalile yini.
Verse 7: Esethole ukwazi ukuthi ungowesifunda sikaHerode, wamthumela kuHerode owayekhona naye eJerusalema ngalezo zinsuku.
Verse 8: Kwathi uHerode embona uJesu, wathokoza kakhulu, ngokuba kwase kukade efuna ukumbona, lokhu ebezwile ngaye; wayethemba ukuthi uzakubona isibonakaliso esithile senziwa nguye.
Verse 9: Wambuza ngamazwi amaningi, kepha yena kamphendulanga ngalutho.
Verse 10: Abapristi abakhulu nababhali babemi bemmangalela kakhulu.
Verse 11: Kepha uHerode namabutho akhe bameyisa, bambhinqa, baze bamembathisa ingubo ecwebezelayo, bambuyisela kuPilatu.
Verse 12: Ngalolo suku oPilatu noHerode baba ngabahlobo; ngokuba ngaphambili kwakukhona ubutha phakathi kwabo.
Verse 13: UPilatu wabizela ndawonye abapristi abakhulu nababusi nabantu,
Verse 14: wathi kubo: “Nilethe kimi lo muntu ngokuthi ungodukisa abantu. Bhekani, mina ngimhlolile phambi kwenu, kepha angifumananga cala lalezo zinto enimmangalela ngazo;
Verse 15: kunjalo noHerode futhi ngokuba umbuyisele kithi; bheka-ke, akenzanga lutho afanele ukufa ngalo.
Verse 16: Ngakho-ke ngiyakumshaya, ngimkhulule.”
Verse 17: Ubemelwe phela ukubakhululela abe munye ngomkhosi.
Verse 18: Kepha bamemeza kanyekanye, bathi: “Susa lo, usikhululele uBaraba,”
Verse 19: yena owayefakwe etilongweni ngenxa yesiyaluyalu esithile esasenzeka emzini, nangenxa yokubulala.
Verse 20: UPilatu wabuye wakhuluma kubo efuna ukumkhulula uJesu;
Verse 21: kodwa bamemeza bathi: “Mbethele, mbethele esiphambanweni!”
Verse 22: Wayesethi kubo ngokwesithathu: “Kanti lo wenze bubi buni na? Angifumananga kuye icala lokufa; ngakho ngiyakumshaya, ngimkhulule.”
Verse 23: Kepha bamcindezela ngokumemeza okukhulu befuna ukuba abethelwe. Ukumemeza kwabo kwanqoba.
Verse 24: Wayesenquma uPilatu ngokuthi akwenziwe abakufunayo.
Verse 25: Wayesemkhulula owayefakwe etilongweni ngenxa yesiyaluyalu nokubulala, ababemcela, kepha wamnikela uJesu kubo njengokuthanda kwabo.
Verse 26: Kwathi bemuka naye, babamba uSimoni waseKhurene evela endle, bamthwesa isiphambano ukuba asithwale emva kukaJesu.
Verse 27: Kwamlandela isixuku esikhulu sabantu, kukhona nabesifazane ababemkhalela, bemlilela.
Verse 28: Kepha uJesu ephendukela kubo wathi: “Madodakazi aseJerusalema, ningangikhaleli mina, kodwa zikhaleleni nina nabantwana benu.
Verse 29: Ngokuba bhekani, kuyeza izinsuku abayakusho ngazo ukuthi: ‘Zibusisiwe izinyumba nezizalo ezingazalanga namabele angancelisanga.’
Verse 30: Khona “ ‘bayakuqala ukuthi ezintabeni: “Welani phezu kwethu,” nasemagangeni: “Sisibekeleni.” ’
Verse 31: “Ngokuba uma benza lokho emthini oluhlaza, kuyakwenziwani kowomileyo.”
Verse 32: Kwakukhona nabanye, izelelesi ezimbili, abayiswa ukuba babulawe kanye naye.
Verse 33: Sebefikile endaweni ethiwa iKhanda bambethela khona nazo izelelesi, esinye ngakwesokunene nesinye ngakwesokhohlo.
Verse 34: Kepha uJesu wathi: “Baba, bathethelele, ngokuba abakwazi abakwenzayo.” Babelana izingubo zakhe, benzelana inkatho.
Verse 35: Abantu bema, bebukela; nababusi bamklolodela bathi: “Wasindisa abanye; kazisindise yena, uma enguKristu okhethiweyo kaNkulunkulu.”
Verse 36: Namabutho ambhinqa, eza kuye, amnika uviniga,
Verse 37: ethi: “Uma uyinkosi yabaJuda, zisindise.”
Verse 38: Kwakukhona nombhalo phezu kwakhe othi: LO YINKOSI YABAJUDA.
Verse 39: Njalo esinye sezelelesi ebeziphanyekiwe samhlambalaza sathi: “Wena awusiye uKristu na? Zisindise kanye nathi.”
Verse 40: Sase siphendula esinye, sasithethisa sathi: “Nawe awumesabi uNkulunkulu, ingani ukulokhu kulahlwa nawe na?
Verse 41: thina kambe ngokufaneleyo, ngokuba samukela okulingene nesikwenzile; kepha lo akenzanga lutho olubi.”
Verse 42: Sase sithi: “Jesu, ngikhumbule, nxa usufike embusweni wakho.”
Verse 43: Wathi kuso: “Ngiqinisile ngithi kuwe: Namuhla uzakuba nami eParadisi.”
Verse 44: Kungaba yihora lesithupha kwase kuba mnyama emhlabeni wonke, kwaze kwaba yihora lesishiyagalolunye;
Verse 45: kwafiphala ilanga, isihenqo sethempeli sadabuka phakathi.
Verse 46: UJesu wamemeza ngezwi elikhulu, wathi: “Baba, ezandleni zakho ngiyawubeka umoya wami.” Eseshilo lokho wafa.
Verse 47: Induna yekhulu ibone okwenzekileyo yamdumisa uNkulunkulu, yathi: “Nempela lowo muntu ube ngolungileyo.”
Verse 48: Zonke izixuku ezazibuthanele ukubukela lokho sezibonile okwenzekileyo, zabuyela emuva, zishaya izifuba zazo.
Verse 49: Bonke abazana naye nabesifazane ababemlandela bevela eGalile bema kude, bebuka lezo zinto.
Verse 50: Bheka-ke, kwakukhona indoda, igama layo nguJosefa, eyilungu lomphakathi, indoda enhle nelungileyo —
Verse 51: yona yayingavumanga icebo nesenzo sabo — eyase-Arimatheya umuzi wabaJuda, eyayibheke umbuso kaNkulunkulu;
Verse 52: yona yaya kuPilatu, yacela isidumbu sikaJesu.
Verse 53: Yasehlisa, yasisonga ngendwangu enhle, yasibeka ethuneni elaliqoshwe edwaleni, lapho kungakabekwa muntu khona.
Verse 54: Kwakulusuku lokulungisela; isabatha lase lizakuqala.
Verse 55: Abesifazane abeza naye bevela eGalile balandela, balibona ithuna nokubekwa kwesidumbu sakhe.
Verse 56: Base bebuyela emuva, balungisa amakha namafutha; kepha ngesabatha baphumula njengokomthetho.