Verse 1: Wabalandisa umfanekiso wokuthi bamelwe ukukhuleka njalo, bangadangali.
Verse 2: Wathi: “Kwakukhona emzini othile umahluleli othile owayengamesabi uNkulunkulu, enganaki muntu.
Verse 3: Kulowo muzi kwakukhona futhi umfelokazi owayelokhu efika kuye, ethi: ‘Ngizwele esitheni sami.’
Verse 4: “Kwaba yisikhathi engavumi; kepha ngasemuva wathi phakathi kwakhe: ‘Nakuba ngingamesabi uNkulunkulu, nginganaki muntu,
Verse 5: nokho-ke ngokuba lo mfelokazi engikhathaza njalo, ngiyakumzwela, funa angizuke ngokufika njalonjalo.’ ”
Verse 6: Yayisithi iNkosi: “Yizwani okushiwo ngumahluleli ongalungile.
Verse 7: UNkulunkulu kayikubezwela yini abakhethiweyo bakhe abakhala kuye imini nobusuku, ababekezelele, na?
Verse 8: Ngithi kini: Uzakubezwela masinyane. Nokho nxa ifika iNdodana yomuntu, imbala iyakufumana ukukholwa emhlabeni na?”
Verse 9: Wayesekhuluma kwabathile ababezethemba ukuthi balungile, bedelela abanye, ebalandisa lo mfanekiso ngokuthi:
Verse 10: “Abantu ababili benyukela ethempelini beya kukhuleka, omunye engumFarisi, omunye engumthelisi.
Verse 11: UmFarisi wema wazikhulekela ngokuthi: ‘Nkulunkulu, ngiyakubonga ngokuba ngingenjengabanye abantu: izigcwelegcwele, abangalungile, iziphingi, nanjengalo mthelisi.
Verse 12: Ngizila ukudla kabili ngeviki, nginikela okweshumi kukho konke enginakho.’
Verse 13: “Kepha umthelisi emi kude wayengafuni nakuphakamisela amehlo akhe ngasezulwini, kodwa washaya isifuba sakhe, ethi: ‘Nkulunkulu, ngihawukele mina soni.’
Verse 14: “Ngithi kini: Lo wehlela endlini yakhe elungisisiwe kunomunye. Ngokuba yilowo nalowo oziphakamisayo uzakuthotshiswa, kodwa ozithobayo uzakuphakanyiswa.”
Verse 15: Baletha kuye nabantwanyana ukuba abaphathe; kepha abafundi bekubona babakhuza.
Verse 16: Kodwa uJesu wababizela kuye, wathi: “Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.
Verse 17: Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo.”
Verse 18: Umbusi othile wayesembuza ethi: “Mfundisi omuhle, ngiyakwenzani ukuba ngidle ifa lokuphila okuphakade na?”
Verse 19: Kepha uJesu wathi kuye: “Ungibizelani ngokuthi ngimuhle na? Kakho omuhle, munye kuphela, uNkulunkulu.
Verse 20: Uyayazi imiyalelo ukuthi: ‘Ungaphingi, ungabulali, ungebi, ungafakazi amanga, yazisa uyihlo nonyoko.’ ”
Verse 21: Kepha wathi: “Konke lokho ngikugcinile kwasebusheni bami.”
Verse 22: UJesu ekuzwa lokho wathi kuye: “Usasilalelwe into inye: thengisa ngakho konke onakho, wabele abampofu, khona uzakuba negugu ezulwini; uze ungilandele.”
Verse 23: Kuthe ekuzwa lokho, wadabuka impela, ngokuba wayenothile kakhulu.
Verse 24: UJesu embona wathi: “Kulukhuni kangakanani kwaba nomnotho ukungena embusweni kaNkulunkulu.
Verse 25: Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.”
Verse 26: Abezwayo base bethi: “Pho, kungasindiswa bani na?”
Verse 27: Kepha wathi: “Okungenzeki kubantu kungenzeka kuNkulunkulu.”
Verse 28: Wayesethi uPetru: “Bheka, thina sishiye okwethu, sakulandela.”
Verse 29: Wathi kubo: “Ngiqinisile ngithi kini: Akukho muntu oshiye indlu, noma umkakhe, noma abafowabo, noma abazali, noma abantwana ngenxa yombuso kaNkulunkulu,
Verse 30: ongayikwamukeliswa okuphindwe kaningi kulesi sikhathi nasenkathini ezayo ukuphila okuphakade.”
Verse 31: Wayesebasondeza kuye abayishumi nambili, wathi kubo: “Bhekani, sikhuphukela eJerusalema; konke okulotshwe ngabaprofethi ngeNdodana yomuntu kuyakugcwaliseka.
Verse 32: Ngokuba izakukhashelwa kwabezizwe, iklolodelwe, idunyazwe, ikhafulelwe ngamathe,
Verse 33: bayishaye, bayibulale; kepha ngosuku lwesithathu izakuvuka.”
Verse 34: Kepha bona kabaqondanga lutho lwalokho; lelo zwi lalifihlakele kubo, abakuqondanga obekushiwo.
Verse 35: Kwathi esesondela eJeriko, impumputhe ethile yayihlezi ngasendleleni inxiba.
Verse 36: Isizwa isixuku sidlula, yabuza ukuthi: “Kuyini lokhu?”
Verse 37: Base beyitshela ukuthi: “Kudlula uJesu waseNazaretha.”
Verse 38: Yayisimemeza ithi: “Jesu, Ndodana kaDavide, ngihawukele!”
Verse 39: Ababehamba phambili bayikhuza ukuba ithule kepha kwayikhona imemeza kakhulu yona, ithi: “Ndodana kaDavide, ngihawukele!”
Verse 40: Wema-ke uJesu, wayala ukuba ilethwe kuye. Isisondele, wayibuza wathi:
Verse 41: “Ufuna ukuba ngikwenzeleni na?” Yathi: “Nkosi, ukuba ngibone.”
Verse 42: UJesu wathi kuyo: “Bona! Ukukholwa kwakho kukusindisile.”
Verse 43: Yayisibona khona lapho, yamlandela imdumisa uNkulunkulu, nabantu bonke bekubona bamnika uNkulunkulu indumiso.