Verse 1: Emva kwezinsuku eziyisithupha uJesu wathatha oPetru, noJakobe, noJohane umfowabo, wakhuphukela nabo entabeni ende bebodwa.
Verse 2: Waphenduka esinye isimo phambi kwabo; ubuso bakhe bakhanya njengelanga, izingubo zakhe zaba mhlophe njengokukhanya.
Verse 3: Bheka, kwabonakala kubo oMose no-Eliya bekhuluma naye.
Verse 4: Wathatha uPetru wathi kuJesu: “Nkosi, kuhle ukuba silapha. Uma uthanda, ngizakwakha lapha amadokodo amathathu, elinye libe ngelakho, elinye libe ngelikaMose, elinye libe ngelika-Eliya.”
Verse 5: Esakhuluma, bheka ifu elikhanyayo labasithibeza; bheka, kwavela izwi efwini, lathi: “Lo uyiNdodana yami ethandekayo engithokozile ngayo; yizweni.”
Verse 6: Kuthe sebezwa lokho abafundi, bawa ngobuso babo, besaba kakhulu.
Verse 7: Kepha uJesu wasondela, wabathinta, wathi: “Sukumani, ningesabi.”
Verse 8: Kepha bephakamisa amehlo abo ababonanga muntu, kuphela uJesu yedwa.
Verse 9: Besehla entabeni, uJesu wabayala wathi: “Ningatsheli muntu lowo mbono, ize ivuke iNdodana yomuntu kwabafileyo.”
Verse 10: Bambuza abafundi, bathi: “Pho, basholoni ababhali ukuthi u-Eliya umelwe ukufika kuqala na?”
Verse 11: Waphendula wathi: “Nempela u-Eliya uyeza, uyakubuyisela konke.
Verse 12: Kepha ngithi kini: U-Eliya sewafika; abamazanga nokho, kodwa benza kuye abakuthandayo. Kanjalo neNdodana yomuntu iyakuhlushwa yibo.”
Verse 13: Khona abafundi baqonda ukuba ubekhuluma kubo ngoJohane uMbhapathizi.
Verse 14: Sebefikile esixukwini, kweza kuye umuntu, waguqa ngamadolo phambi kwakhe,
Verse 15: wathi: “Nkosi, hawukela indodana yami, ngokuba inesithuthwane, ihlupheka kabi, lokhu iwela kaningi emlilweni, kaningi emanzini.
Verse 16: Ngiyilethe kubafundi bakho, kepha bahluleka ukuyiphulukisa.”
Verse 17: UJesu waphendula wathi: “O! sizukulwane esingakholwayo nesiphambeneyo, koze kube nini nginani na? Koze kube nini nginibekezelela na? Yiletheni lapha kimi.”
Verse 18: UJesu wayeseyikhuza, idemoni laphuma kuyo; umfana waphulukiswa kusukela kuleso sikhathi.
Verse 19: Khona kwafika abafundi kuJesu bebodwa, bathi: “Thina besingemkhiphe ngani na?”
Verse 20: Wayesethi kubo: “Kungenxa yokukholwa kwenu okuncane. Ngokuba ngiqinisile ngithi kini: Uma ninokukholwa njengembewu yesinaphi, niyakuthi kule ntaba: ‘Suka lapha, uye laphaya,’ iyakusuka; akukho okuyakunahlula.
Verse 21: Kepha lolo hlobo aluphumi ngaphandle kokuba kube ngokukhuleka nokuzila ukudla.”
Verse 22: Besahambahamba eGalile, uJesu wathi kubo: “INdodana yomuntu izakukhashelwa ezandleni zabantu;
Verse 23: bazakuyibulala, kepha ngosuku lwesithathu izakuvuswa.” Badabuka kakhulu.
Verse 24: Kwathi ukuba bafike eKapernawume, abaqoqi bemali yethempeli beza kuPetru, bathi: “Umfundisi wenu akayitheli imali yethempeli na?”
Verse 25: Wathi: “Uyayithela.” Esengene endlini uJesu wamandulela, wathi: “Usho ukuthini, Simoni? Amakhosi omhlaba athatha kubaphi intela nenkokhiso, kumadodana awo noma kubafo, na?”
Verse 26: Wathi: “Kubafo.” UJesu wayesethi: “Ngakho-ke amadodana akhululekile.
Verse 27: Kodwa-ke ukuba singabakhubekisi, yana elwandle, uphonse udobo, ubambe inhlanzi ephuma kuqala; wothi ukuba uyivule umlomo, uzakufumana imali; yithathe, ubanike, usithelele mina nawe.”