Verse 1: “Ngokuba umbuso wezulu ufana nomuntu ongumninindlu owaphuma ekuseni ukuqasha izisebenzi ziye esivinini sakhe.
Verse 2: Esevumelene nezisebenzi ngodenariyu ngosuku, wazithumela esivinini sakhe.
Verse 3: “Waphuma futhi ngehora lesithathu, wabona abanye bemi esigcawini, bengenzi lutho;
Verse 4: nakubo wathi: ‘Yanini nani esivinini; ngiyakuninika okufaneleyo.’
Verse 5: Baya-ke. “Waphuma futhi ngehora lesithupha nangelesishiyagalolunye, wenze njalo.
Verse 6: Esephuma ngehora leshumi nanye wafumana abanye bemi, wathi kubo: ‘Nimeleni lapha usuku lonke ningenzi lutho na?’
Verse 7: “Bathi kuye: ‘Ngokuba akakho osiqashileyo.’ “Wathi kubo: ‘Hambani nani, niye esivinini.’
Verse 8: “Kepha selishonile, umninisivini wathi enduneni yakhe: ‘Biza izisebenzi, uzikhokhele imali yazo, uqale ngezokugcina, ugcine ngezokuqala.’
Verse 9: “Kuthe befika abehora leshumi nanye, kwaba yilowo nalowo wamukela udenariyu.
Verse 10: Sekuza abokuqala, bathi bazakwamukela okukhulu; kepha nabo bamukela udenariyu ngabanye.
Verse 11: Kepha sebamukela bakhonona ngomninindlu,
Verse 12: bathi: ‘Laba abokugcina basebenze ihora linye nje, ubalinganise nathi esithwalile ubunzima nesifudumezi semini.’
Verse 13: “Waphendula, wathi komunye wabo: ‘Mngane, angikoni; kanti asivumelananga ngodenariyu na?
Verse 14: Thatha okwakho, uhambe; kepha ngiyathanda ukunika lo wokugcina njengawe.
Verse 15: Angivunyelwe ukwenza engikuthandayo ngokungokwami na? Kumbe iso lakho libi, ngokuba mina ngimuhle na?’
Verse 16: “Kanjalo abokugcina bayakuba ngabokuqala, nabokuqala babe ngabokugcina.”
Verse 17: Kwathi uJesu esezakwenyukela eJerusalema, wathatha abafundi abayishumi nambili, wagudluka nabo; besesendleleni, wathi kubo:
Verse 18: “Bhekani, sikhuphukela eJerusalema; iNdodana yomuntu izakukhashelwa kubapristi abakhulu nababhali; bazakuyinqumela ukuba ife,
Verse 19: bayikhaphele kwabezizwe ukuba iklolodelwe, ishaywe, ibethelwe esiphambanweni; kepha ngosuku lwesithathu izakuvuswa.”
Verse 20: Khona kwafika kuye unina wamadodana kaZebedewu kanye namadodana akhe; wakhuleka, wacela into kuye.
Verse 21: Yena wathi kuye: “Ufunani na?” Wathi kuye: “Yisho ukuba lawa madodana ami amabili ahlale, enye ngakwesokunene sakho, enye ngakwesokhohlo sakho embusweni wakho.”
Verse 22: UJesu waphendula wathi: “Anikwazi enikucelayo. Ningasiphuza yini isitsha engizakusiphuza na?” Bathi kuye: “Singakwenza.”
Verse 23: Wathi kubo: “Yebo, nizakusiphuza isitsha sami, kepha ukuhlala ngakwesokunene sami nangakwesokhohlo akusikho okwami ukuphana ngakho, kodwa kungokwalabo abakulungiselwe nguBaba.”
Verse 24: Bathi ukuzwa lokho abayishumi, bazithukuthelela izelamani ezimbili.
Verse 25: Kepha uJesu wababiza, wathi: “Niyazi ukuthi ababusi bezizwe bazenza amakhosi phezu kwazo, nezikhulu zazo ziphethe amandla phezu kwazo.
Verse 26: Akunjalo phakathi kwenu, kodwa yilowo nalowo ofuna ukuba mkhulu phakathi kwenu makabe yisikhonzi senu;
Verse 27: nalowo ofuna ukuba ngowokuqala phakathi kwenu makabe yinceku yenu,
Verse 28: njengalokho iNdodana yomuntu ingezelanga ukukhonzwa kepha ukukhonza nokunikela ukuphila kwayo, kube yisihlengo sabaningi.”
Verse 29: Sebephuma eJeriko, isixuku esikhulu samlandela.
Verse 30: Bheka, kwakuhlezi izimpumputhe ezimbili ngasendleleni; kuthe zizwa ukuthi uJesu uyadlula, zamemeza zathi: “Nkosi, Ndodana kaDavide, sihawukele!”
Verse 31: Kepha isixuku sazikhuza ukuba zithule, kodwa kwayikhona zimemeza kakhulu, zithi: “Nkosi, Ndodana kaDavide, sihawukele!”
Verse 32: UJesu wema, wazibiza wathi: “Nifuna ukuba nginenzeleni na?”
Verse 33: Zathi kuye: “Nkosi, ukuba amehlo ethu avuleke.”
Verse 34: UJesu waba nesihe, waphatha amehlo azo; zase zibona masinyane, zamlandela.