Verse 1: sekusile, bonke abapristi abakhulu namalunga esizwe benza icebo ngoJesu lokuba bambulale;
Verse 2: bambopha, bamuka naye, bamnikela kuPilatu umbusi.
Verse 3: Khona uJuda owamkhaphelayo, ebona ukuthi ulahliwe, wazisola, wabuyisela izinhlamvu zesiliva ezingamashumi amathathu kubapristi namalunga,
Verse 4: wathi: “Ngonile ukuba ngikhaphele igazi elingenacala.” Bona bathi: “Kuyini lokho kithi na? Zibonele wena.”
Verse 5: Wayesephonsa izinhlamvu zesiliva ethempelini, wamuka, waziphanyeka.
Verse 6: Kepha abapristi abakhulu bazithatha izinhlamvu zesiliva, bathi: “Akuvunyelwe ukuzifaka emnikelweni, ngokuba kuyimali yegazi.”
Verse 7: Benza icebo, bathenga ngayo insimu yombumbi, ibe ngeyokumbela abafokazi.
Verse 8: Ngalokho insimu leyo ithiwa insimu yegazi kuze kube namuhla.
Verse 9: Khona kwagcwaliseka okwashiwo ngomprofethi uJeremiya ukuthi: “Bathatha izinhlamvu zesiliva ezingamashumi amathathu, inani lowamiselwa inani onani lakhe lamiswa ngamadodana ka-Israyeli;
Verse 10: bakhokha ngazo insimu yombumbi, njengokuba iNkosi ingiyalile.”
Verse 11: Kepha uJesu wayemi phambi kombusi; umbusi wambuza wathi: “Wena uyinkosi yabaJuda na?” UJesu wathi kuye: “Usho khona.”
Verse 12: Kwathi lapho abapristi abakhulu namalunga bemthwesa icala, kaphendulanga lutho.
Verse 13: Khona uPilatu wathi kuye: “Awuzwa yini lokho okungaka abakufakaza ngawe na?”
Verse 14: Akaze amphendula nakwelilodwa izwi, umbusi waze wamangala kakhulu.
Verse 15: Kepha ngomkhosi umbusi wayejwayele ukukhululela isixuku isiboshwa sibe sinye esasisithanda.
Verse 16: Ngaleso sikhathi babe nesiboshwa esidumileyo esithiwa uBaraba.
Verse 17: Ngakho sebebuthene, uPilatu wathi kubo: “Nithanda ukuba nginikhululele bani, uBaraba nokuba uJesu othiwa uKristu, na?”
Verse 18: Ngokuba wayekwazi ukuthi bamnikele ngomhawu.
Verse 19: Esahlezi esihlalweni sokwahlulela, umkakhe wathumela kuye, wathi: “Ungabi nandaba kulowo muntu olungileyo; ngokuba ngihluphekile kakhulu namuhla ngaye ephusheni.”
Verse 20: Kepha abapristi abakhulu namalunga bancenga izixuku ukuba zicele uBaraba, zimbulale uJesu.
Verse 21: Wayesephendula umbusi, wathi kubo: “Nithanda ukuba nginikhululele muphi kulaba ababili na?” Bathi: “UBaraba.”
Verse 22: UPilatu wathi kubo: “Pho-ke, ngimenze njani uJesu othiwa uKristu na?” Bonke bathi: “Makabethelwe esiphambanweni.”
Verse 23: Wayesethi: “Ngokuba wenze bubi buni na?” Kepha bamemeza kakhulu, bathi: “Makabethelwe esiphambanweni.”
Verse 24: UPilatu esebona ukuthi akanakwenza lutho nokuthi isiphithiphithi sesanda kakhulu, wathatha amanzi, wahlamba izandla phambi kwesixuku, wathi: “Anginacala egazini lalo muntu; ziboneleni nina.”
Verse 25: Abantu bonke base bephendula bethi: “Igazi lakhe malibe phezu kwethu naphezu kwabantwana bethu.”
Verse 26: Wayesebakhululela uBaraba, kepha wamshaya uJesu, wamnikela ukuba abethelwe esiphambanweni.
Verse 27: Khona amabutho ombusi ayesemthatha uJesu, amngenisa enqabeni, aqoqela kuye ibutho lonke.
Verse 28: Amhlubula, amembathisa ingubo ebomvu,
Verse 29: aluka umqhele wameva, awufaka ekhanda lakhe, nomhlanga esandleni sakhe sokunene, aguqa ngamadolo phambi kwakhe, ambhinqa athi: “Bayede, nkosi yabaJuda!”
Verse 30: Amkhafulela ngamathe, athatha umhlanga, amshaya ekhanda lakhe.
Verse 31: Esembhinqile amhlubula ingubo, amembathisa izingubo zakhe, amuka naye ukuyombethela esiphambanweni.
Verse 32: Esaphuma afumana umuntu waseKhurene, nguSimoni igama lakhe; amcindezela lowo ukuba athwale isiphambano sakhe.
Verse 33: Esefikile endaweni ethiwa iGolgotha okungukuthi iNdawo Yekhanda,
Verse 34: amphuzisa iwayini elixutshwe nenyongo; kepha kuthe elizwa, akathandanga ukuliphuza.
Verse 35: Esembethele esiphambanweni abelana izingubo zakhe, enzelana inkatho;
Verse 36: ahlala amlinda khona.
Verse 37: Abeka ngaphezu kwekhanda lakhe icala lakhe libhalwe ngokuthi: LO NGUJESU, INKOSI YABAJUDA.
Verse 38: Kwabethelwa kanye naye abaphangi ababili, omunye ngakwesokunene nomunye ngakwesokhohlo.
Verse 39: Kepha abadlulayo bamhlambalaza benikina amakhanda abo,
Verse 40: bathi: “Wena odiliza ithempeli, ubuye ulakhe ngezinsuku ezintathu, zisindise, uma uyiNdodana kaNkulunkulu, wehle esiphambanweni.”
Verse 41: Kanjalo nabapristi abakhulu bambhinqa kanye nababhali namalunga, bathi:
Verse 42: “Wasindisa abanye, angezisindise yena; uyinkosi yakwa-Israyeli, akehle manje esiphambanweni, sikholwe nguye.
Verse 43: Wethembile uNkulunkulu; makamkhulule manje, uma emthanda, ngokuba wathi: ‘NgiyiNdodana kaNkulunkulu.’ ”
Verse 44: Kepha nabaphangi ababebethelwe esiphambanweni kanye naye bamdumaza kanjalo.
Verse 45: Kepha kusukela ngehora lesithupha kwaba mnyama emhlabeni wonke, kwaze kwaba yihora lesishiyagalolunye.
Verse 46: Kepha ngehora lesishiyagalolunye uJesu wamemeza ngezwi elikhulu, wathi: “Eli, Eli, lama sabaktani?” okungukuthi: “Nkulunkulu wami, Nkulunkulu wami, ungishiyeleni na?”
Verse 47: Abanye kwababemi khona bekuzwa bathi: “Lo ubiza u-Eliya.”
Verse 48: Masinyane omunye kubo wagijima, wathatha ilula, waligcwalisa ngoviniga, walihloma emhlangeni, wamphusiza.
Verse 49: Kepha abanye bathi: “Yeka, sibone uma u-Eliya eza ukumsindisa.”
Verse 50: UJesu wabuye wamemeza ngezwi elikhulu, wafa.
Verse 51: Bheka-ke, isihenqo sethempeli sadabuka kabili, kusukela phezulu kuze kufike phansi; umhlaba wazamazama, amadwala aqhekezeka;
Verse 52: amathuna avuleka, imizimba eminingi yabangcwele ababelele yavuka;
Verse 53: baphuma emathuneni emva kokuvuka kwakhe, bangena emzini ongcwele, babonakala kwabaningi.
Verse 54: Kepha induna yekhulu nababe nayo belinda uJesu sebebona ukuzamazama nalokho okwenzekileyo besaba kakhulu, bathi: “Nempela lo ube yiNdodana kaNkulunkulu.”
Verse 55: Kwakukhona lapho abesifazane abaningi bebukela, bekude, ababemlandele uJesu bevela eGalile, bemkhonza;
Verse 56: phakathi kwabo kwakukhona oMariya Magdalena, unina kaJakobe nokaJose, nonina wamadodana kaZebedewu.
Verse 57: Sekuhlwile, kwafika umuntu ocebileyo wase-Arimatheya, igama lakhe nguJosefa, owayengumfundi kaJesu naye;
Verse 58: lo waya kuPilatu, wacela isidumbu sikaJesu. Khona uPilatu wayala ukuba anikwe sona.
Verse 59: UJosefa wasithatha isidumbu, wasisonga ngendwangu enhle ehlanzekileyo,
Verse 60: wasibeka ethuneni lakhe elisha ayeliqophe edwaleni, wagingqela itshe elikhulu emnyango wethuna, wahamba.
Verse 61: Kepha kwakukhona lapho uMariya Magdalena nomunye uMariya behlezi phambi kweliba.
Verse 62: Kepha ngangomuso okungolulandela usuku lokulungisela abapristi abakhulu nabaFarisi babuthana kuPilatu,
Verse 63: bathi: “Nkosi, sikhumbula ukuthi lowo mkhohlisi esekhona wathi: ‘Emva kwezinsuku ezintathu ngizakuvuka.’
Verse 64: Ngakho yala ukuba iliba ligcinwe kuze kube lusuku lwesithathu ukuba abafundi bakhe bangaze bafike bamebe, bathi kubantu: ‘Uvukile kwabafileyo;’ kuthi inkohliso yokugcina ibe mbi kuneyokuqala.”
Verse 65: UPilatu wathi kubo: “Nampa abalindi; hambani niligcine njengokubona kwenu.”
Verse 66: Base behamba, baligcina iliba, babeka uphawu etsheni bekanye nabalindi.