Verse 1: wathatha wakhuluma futhi kubo ngemifanekiso, wathi:
Verse 2: “Umbuso wezulu ufaniswa nomuntu oyinkosi, owenzela indodana yakhe umshado.
Verse 3: Wathuma izinceku zakhe ukubiza abamenyiweyo emshadweni; kepha abavumanga ukuza.
Verse 4: “Waphinda wathuma ezinye izinceku, wathi: ‘Shonini kwabamenyiweyo ukuthi: Bhekani, sengilungisile ukudla kwami; izinkabi zami nokunonileyo sekuhlatshiwe; konke sekulungile, wozani emshadweni.’
Verse 5: “Kepha badelela, bahamba; omunye waya ensimini yakhe, omunye waya entengweni yakhe.
Verse 6: Abaseleyo babamba izinceku zakhe, baziphatha kabi, bazibulala.
Verse 7: Kepha inkosi yathukuthela, yathuma amabutho ayo, yabulala labo babulali, yashisa umuzi wabo.
Verse 8: “Khona yathi ezincekwini zayo: ‘Umshado usulungiselwe, kepha abamenyiweyo bebengafanele;
Verse 9: ngakho-ke hambani niye ezinhlanganweni zezindlela, nibizele emshadweni bonke eningabafumana.’
Verse 10: Lezo zinceku zaphuma, zaya ezindleleni, zabutha bonke ezabafumanayo, ababi nabahle; indlu yomshado yagcwala abahleziyo ekudleni.
Verse 11: “Kuthe inkosi ingena ukubona abahleziyo ekudleni, yabona khona umuntu obengayembethe ingubo yomshado;
Verse 12: yathi kuye: ‘Mngane, ungene kanjani lapha ungayembethe ingubo yomshado na?’ Kepha wathula.
Verse 13: “Khona inkosi yathi ezincekwini: ‘Mbopheni izinyawo nezandla, nimphonse ebumnyameni obungaphandle; lapho kuyakuba khona ukukhala nokugedla amazinyo.’
Verse 14: “Ngokuba baningi ababiziweyo, kepha bayingcosana abakhethiweyo.”
Verse 15: Khona abaFarisi basuka, bacebisana ukuba bamhile ngezwi.
Verse 16: Bathuma kuye abafundi babo kanye nabakaHerode, bathi: “Mfundisi, siyazi ukuthi uqinisile, ufundisa indlela kaNkulunkulu ngeqiniso; awukhathali ngamuntu, ngokuba awubheki ubuso babantu.
Verse 17: Ngakho sitshele, uthini wena? Kuvunyelwe ukuthela kuKesari noma qha?”
Verse 18: Kepha uJesu ebazi ububi babo wathi: “Bazenzisi, ningilingelani na?
Verse 19: Ngitshengiseni imali yokuthela,” bamtshengisa udenariyu.
Verse 20: Wayesethi kubo: “Ngokabani lo mfanekiso nalo mbhalo na?”
Verse 21: Bathi: “NgokaKesari.” Khona wathi kubo: “Ngakho-ke nikani uKesari okukaKesari noNkulunkulu okukaNkulunkulu.”
Verse 22: Sebezwile lokho bamangala, bamshiya, bamuka.
Verse 23: Ngalolo suku kwafika kuye abaSadusi abathi akukho ukuvuka kwabafileyo, bambuza
Verse 24: bathi: “Mfundisi, uMose wathi: ‘Uma umuntu efa engenabantwana, umfowabo kamngene umkakhe, amvusele umfowabo inzalo.’
Verse 25: Kwakukhona-ke kithi izelamani eziyisikhombisa: owokuqala waganwa, wafa; engenanzalo washiya umkakhe kumfowabo.
Verse 26: Kanjalo nowesibili nowesithathu, kwaze kwaba kowesikhombisa.
Verse 27: Emva kwabo bonke wafa umfazi.
Verse 28: Pho, ekuvukeni kwabafileyo uyakuba ngumkabani kwabayisikhombisa, lokhu bonke babe naye, na?”
Verse 29: Kepha uJesu waphendula, wathi kubo: “Nidukile ningayazi imibhalo namandla kaNkulunkulu.
Verse 30: Ngokuba ekuvukeni kwabafileyo abaganwa, abendiswa, kodwa banjengezingelosi ezulwini.
Verse 31: Kepha maqondana nokuvuka kwabafileyo anifundanga yini okwakhulunywa kini nguNkulunkulu, ethi:
Verse 32: ‘Mina nginguNkulunkulu ka-Abrahama, noNkulunkulu ka-Isaka, noNkulunkulu kaJakobe,’ na? Akasiye uNkulunkulu wabafileyo kodwa owabaphilayo.”
Verse 33: Kwathi izixuku zikuzwa lokho, zamangala ngokufundisa kwakhe.
Verse 34: AbaFarisi sebezwile ukuthi uJesu ubathulisile abaSadusi, babuthana ndawonye.
Verse 35: Omunye wabo, isazimthetho, wamlinga, wathi:
Verse 36: “Mfundisi, ngumuphi umyalo omkhulu emthethweni na?”
Verse 37: UJesu wathi kuye: “ ‘Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho.’
Verse 38: Yilowo umyalo omkhulu nowokuqala.
Verse 39: Owesibili ofana nawo uthi: ‘Wothanda umakhelwane wakho njengalokhu uzithanda wena.’
Verse 40: Kuleyo miyalo emibili kubambelela umthetho wonke nabaprofethi.”
Verse 41: Besabuthene abaFarisi, uJesu wababuza,
Verse 42: wathi: “Nithini ngoKristu na? Uyindodana kabani na?” Bathi kuye: “EkaDavide.”
Verse 43: Wathi kubo: “Pho, uDavide ngoMoya wambiza kanjani ngokuthi iNkosi, ethi:
Verse 44: “ ‘INkosi yathi eNkosini yami: “Hlala ngakwesokunene sami, ngize ngibeke izitha zakho phansi kwezinyawo zakho.” ’
Verse 45: “Ngakho-ke uma uDavide embiza ngokuthi iNkosi, uyindodana yakhe kanjani na?”
Verse 46: Kwakungekho obengamphendula ngazwi; emva kwalolo suku akwabe kusabakho muntu onesibindi sokumbuza lutho.