Verse 1: Kuthe uJesu ephuma ethempelini, emuka, kwasondela abafundi bakhe ukumtshengisa izakhiwo zethempeli.
Verse 2: Waphendula, wathi kubo:Anikuboni konke lokhu na? Ngiqinisile ngithi kini: Akuyikushiywa lapha itshe phezu kwetshe elingayikudilizelwa phansi.
Verse 3: Esahlezi eNtabeni Yeminqumo, abafundi beza kuye bebodwa, bathi: Sitshele ukuthi lokhu kuyakuba nini, nesibonakaliso sokuza kwakho nesokuphela kwezwe siyakuba yini na?
Verse 4: UJesu waphendula, wathi kubo: Qaphelani ningadukiswa muntu.
Verse 5: Ngokuba kuyakuza abaningi ngegama lami, bathi: Mina nginguKristu, badukise abaningi.
Verse 6: Niyakuzwa izimpi namahemuhemu ezimpi. Bhekani ningethuki, ngokuba kumelwe ukuba kwenzeke, kepha ukuphela koba kungakafiki.
Verse 7: Ngokuba isizwe siyakuvukela isizwe, nombuso uvukele umbuso, kube khona indlala nokuzamazama komhlaba izindawo ngezindawo.
Verse 8: Kepha konke lokho kungukuqala kwemihelo.
Verse 9: Lapho-ke bayakunikhaphela osizini, banibulale; niyakuzondwa yizizwe zonke ngenxa yegama lami.
Verse 10: Khona-ke abaningi bayakukhubeka, bakhaphelane, bazondane.
Verse 11: Kuyakuvela abaprofethi bamanga abaningi, badukise abaningi.
Verse 12: Ngenxa yokwanda kokubi kuzakuphola uthando lwabaningi.
Verse 13: Kodwa okhuthazelayo kuze kube sekupheleni nguyena oyakusindiswa.
Verse 14: Leli vangeli lombuso liyakushunyayelwa ezweni lonke, kube ngubufakazi ezizweni zonke, andukuba kufike ukuphela.
Verse 15: Ngakho-ke nxa nibona amanyala encithakalo ashiwo nguDaniyeli umprofethi emi endaweni engcwele ofundayo makaqaphele
Verse 16: khona abaseJudiya mababalekele ezintabeni,
Verse 17: ophezu kwendlu angehli ukuyothatha okusendlini yakhe,
Verse 18: osensimini angabuyeli emuva ukuyothatha ingubo yakhe.
Verse 19: Kepha maye kwabakhulelweyo nabancelisayo ngalezo zinsuku!
Verse 20: Khulekani ukuba ukubaleka kwenu kungabi sebusika nangesabatha.
Verse 21: Ngokuba lapho kuyakuba khona usizi olukhulu olungazange lube khona kwasekuqaleni kwezwe kuze kube manje nolungasayikuba khona.
Verse 22: Uma lezo zinsuku zingafinyezwanga, bekungesindiswe muntu; kepha ngenxa yabakhethiweyo lezo zinsuku ziyakufinyezwa.
Verse 23: Khona uma umuntu ethi kini: Bhekani, nangu uKristu, noma: Nanguya, ningakholwa.
Verse 24: Ngokuba kuyakuvela okristu bamanga nabaprofethi bamanga, baveze izibonakaliso ezinkulu nezimangaliso, ukuze kudukiswe nabakhethiweyo, uma kungenzeka.
Verse 25: Bhekani, senginitshelile ngaphambili.
Verse 26: Ngakho-ke uma bethi kini: Bhekani, usehlane, ningaphumi; noma bethi: Bhekani, usendlini, ningakholwa;
Verse 27: ngokuba njengonyazi luphuma empumalanga, lubonakale kuze kube sentshonalanga, kuyakuba njalo ukufika kweNdodana yomuntu.
Verse 28: Nomaphi lapho kukhona isidumbu, kulapho amanqe eyakubuthana khona.
Verse 29: Kepha masinyane emva kosizi lwalezo zinsuku ilanga liyakufiphazwa, nenyanga ayiyikukhanya, nezinkanyezi ziyakuwa ezulwini, namandla ezulu ayakuzanyazanyiswa.
Verse 30: Khona kuyakubonakala ezulwini isibonakaliso seNdodana yomuntu, bese zikhala izizwe zonke zomhlaba, zibone iNdodana yomuntu iza emafwini ezulu, inamandla nenkazimulo enkulu.
Verse 31: Iyakuthuma izingelosi zayo ngokukhala okukhulu kwecilongo, ziqoqe abakhethiweyo bayo emimoyeni yomine, kusukela emkhawulweni omunye wezulu kuze kube komunye.
Verse 32: Fundani umfanekiso emkhiwaneni; nxa igatsha lawo selithamba, lihlume amaqabunga, niyazi ukuthi ihlobo seliseduze.
Verse 33: Kanjalo nani, nxa nibona konke lokhu, yazini ukuthi iseduze ngasemnyango.
Verse 34: Ngiqinisile ngithi kini: Lesi sizukulwane asiyikudlula kungakenzeki konke lokhu.
Verse 35: Kuyakudlula izulu nomhlaba, kepha amazwi ami awasoze adlula.
Verse 36: Kepha lolo suku nalelo hora akakho owazi lutho ngalo nazingelosi zasezulwini, naNdodana, nguBaba kuphela.
Verse 37: Ngokuba njengasemihleni kaNowa, kuyakuba njalo ukufika kweNdodana yomuntu.
Verse 38: Ngokuba njengasezinsukwini lezo ezandulela uzamcolo babedla, bephuza, beganwa, bendiswa, kwaze kwafika usuku uNowa angena ngalo emkhunjini,
Verse 39: abazanga kwaze kwafika uzamcolo wabakhukhula bonke, kuyakuba njalo ukufika kweNdodana yomuntu.
Verse 40: Khona-ke kuyakuba khona ababili ensimini, omunye athathwe, omunye ashiywe;
Verse 41: ababili boba besila etsheni, omunye athathwe, omunye ashiywe.
Verse 42: Ngakho-ke lindani, ngokuba anazi ukuthi iNkosi yenu iyakufika ngaluphi usuku.
Verse 43: Kepha anokwazi lokhu ukuthi, uma umninindlu ebewazi umlindo isela eliyakufika ngawo, ubeyakulinda, angavumi ukuba indlu yakhe ifohlwe.
Verse 44: Ngalokho nani hlalani nilungele, ngokuba iNdodana yomuntu iyakufika ngesikhathi eningasicabangiyo.
Verse 45: �Pho, ngubani oyinceku ethembekileyo neqondayo, inkosi yayo eyimisile phezu kwabendlu yayo ukuba ibanike ukudla ngesikhathi sakho na?
Verse 46: Ibusisiwe leyo nceku, okuyakuthi kufika inkosi yayo, iyifumane yenze njalo.
Verse 47: Ngiqinisile ngithi kini: Iyakuyimisa phezu kwakho konke enakho.
Verse 48: Kodwa uma leyo nceku embi ithi enhliziyweni yayo: Inkosi yami ilibele,
Verse 49: iqale ukushaya izinceku ezikanye nayo, idle, iphuze nezidakwa,
Verse 50: inkosi yaleyo nceku iyakufika ngosuku engayibhekile ngalo nangehora engalaziyo,
Verse 51: iyinqamule kabili, iyimisele isabelo sayo kanye nabazenzisi; kuyakuba khona lapho ukukhala nokugedla amazinyo.