Verse 1: Bawungenisa umphongolo kaNkulunkulu, bawubeka phakathi netende uDavide ayelimisele wona; banikela ngeminikelo yokushiswa nangeminikelo yokuthula phambi kukaNkulunkulu.
Verse 2: UDavide eseqedile ukunikela ngomnikelo wokushiswa nangeminikelo yokuthula wababusisa abantu egameni likaJehova.
Verse 3: Wabela bonke abantu bakwa-Israyeli, abesilisa nabesifazane, isinkwa saba sinye, nesicubu senyama, nesigaxa sezithelo zomvini ezomileyo.
Verse 4: Wabela amaLevi athile ukukhonza phambi komphongolo kaJehova ukuba amkhumbule, ambonge, amdumise uJehova uNkulunkulu ka-Israyeli:
Verse 5: ngu-Asafa inhloko nabesigaba sakhe sesibili, oZakariya, noJehiyeli, noShemiramoti, noJehiyeli, noMatithiya, no-Eliyabe, noBenaya, no-Obede Edomi, noJehiyeli, benezingubhu namahabhu, kanye no-Asafa ephethe amasimbali, ewabetha,
Verse 6: noBenaya noJahaziyeli abapristi, benamacilongo njalo phambi komphongolo wesivumelwano sikaNkulunkulu.
Verse 7: Ngalolo suku uDavide wayeseqala ukuhlela ukuba uJehova abongwe ngesandla sika-Asafa nabafowabo.
Verse 8: Bongani uJehova, nibize igama lakhe, nizazise phakathi kwabantu izenzo zakhe.
Verse 9: Hlabelelani kuye, nimhubele, nikhulume ngezimangaliso zakhe zonke.
Verse 10: Zibongeni egameni lakhe elingcwele; mazithokoze izinhliziyo zabamfuna uJehova.
Verse 11: Funani uJehova namandla akhe, nifunisise ubuso bakhe njalo.
Verse 12: Khumbulani izimangaliso zakhe azenzileyo, nezibonakaliso zakhe, nezahlulelo zomlomo wakhe,
Verse 13: nina nzalo ka-Israyeli, inceku yakhe, nina bantwana bakaJakobe, abakhethiweyo bakhe.
Verse 14: Yena unguJehova uNkulunkulu wethu; izahlulelo zakhe zisemhlabeni wonke.
Verse 15: Khumbulani isivumelwano sakhe kuze kube phakade, izwi ayala ngalo izizukulwane eziyinkulungwane,
Verse 16: avumelana kuso no-Abrahama, nesifungo sakhe ku-Isaka;
Verse 17: wasiqinisa kuJakobe, saba ngumthetho, naku-Israyeli, saba yisivumelwano esiphakade,
Verse 18: ethi: “Ngizakukunika izwe laseKhanani libe yisabelo sefa lakho,
Verse 19: lapho naniyingcosana ngomumo, yebo, lapho naniyingcosana, futhi naniyizihambi kulo.”
Verse 20: Bazulazula ezizweni ngezizwe, besuka kulo mbuso, beya kwabanye abantu.
Verse 21: Akavumelanga muntu ukubahlupha, wajezisa amakhosi ngenxa yabo,
Verse 22: ethi: “Ningathinti abagcotshiweyo bami, ningoni abaprofethi bami.”
Verse 23: Hlabelelani kuJehova, mhlaba wonke, nimemeze insindiso yakhe imihla ngemihla.
Verse 24: Landani inkazimulo yakhe phakathi kwabezizwe, izimangaliso zakhe phakathi kwabantu bonke.
Verse 25: Ngokuba mkhulu uJehova, udumisekile kakhulu; uyesabeka phezu kwabo bonke onkulunkulu.
Verse 26: Ngokuba bonke onkulunkulu babezizwe bayizithombe, kepha uJehova walenza izulu.
Verse 27: Udumo nobukhosi kusebusweni bakhe; amandla nokuthokoza kusendaweni yakhe.
Verse 28: Mnikeni uJehova nina mindeni yabantu, mnikeni uJehova inkazimulo namandla.
Verse 29: Mnikeni uJehova inkazimulo yegama lakhe, nilethe umnikelo, nize phambi kwakhe, nikhuleke kuJehova ngobuhle bobungcwele.
Verse 30: Thuthumelani ebusweni bakhe, mhlaba wonke; izwe lihlala liqinile, alinakushukunyiswa.
Verse 31: Malijabule izulu, umhlaba uthokoze; makuthiwe ezizweni: UJehova uyinkosi.
Verse 32: Maluhlokome ulwandle nokugcwala kwalo, amasimu ename nakho konke okukuwo.
Verse 33: Khona imithi yehlathi iyakuhuba ngokujabula ebusweni bukaJehova, ngokuba uyeza ukwahlulela umhlaba.
Verse 34: Bongani uJehova, ngokuba muhle, ngokuba umusa wakhe umi phakade.
Verse 35: Thanini: “Sisindise, Nkulunkulu wokusindiswa kwethu, usibuthe, usophule kwabezizwe ukuba sidumise igama lakho elingcwele, sethabe ekukudumiseni.”
Verse 36: Makabongwe uJehova uNkulunkulu ka-Israyeli, kusukela phakade kuze kube phakade. Bonke abantu bathi: “Amen,” bamdumisa uJehova.
Verse 37: Wayeseshiya khona ngaphambi komphongolo wesivumelwano sikaJehova u-Asafa nabafowabo ukuba bakhonze phambi komphongolo njalo ngokomsebenzi wemihla ngemihla,
Verse 38: kanye no-Obede Edomi nabafowabo abangamashumi ayisithupha nesishiyagalombili u-Obede Edomi indodana kaJeduthuni noHosa babe ngabalindisango
Verse 39: noSadoki umpristi nabafowabo abapristi ngaphambi kwetabernakele likaJehova endaweni ephakemeyo eyayiseGibeyoni
Verse 40: ukuba banikele njalo ngeminikelo yokushiswa phezu kwe-altare lomnikelo wokushiswa ekuseni nakusihlwa njengakho konke okulotshiweyo emthethweni kaJehova ayala ngawo u-Israyeli,
Verse 41: bekanye nabo oHemani noJeduthuni nensali yabakhethiweyo abakhonjwa ngamagama ukuba bambonge uJehova, ngokuba umusa wakhe umi phakade;
Verse 42: kwakukhona kubo, oHemani noJeduthuni, amacilongo namasimbali alabo abayakuwakhalisa, nezinto zokubethwa kuNkulunkulu; amadodana kaJeduthuni ayengasesangweni.
Verse 43: Base behamba baya, kwaba yilowo nalowo endlini yakhe; uDavide wabuya ukubusisa indlu yakhe.