Verse 1: Ungcono ompofu ohamba ekupheleleni kwakhe kunophambene ngezindebe zakhe eyisiwula.
Verse 2: Futhi akulungile ukuba umphefumulo ungabi nakwazi; oshesha ngezinyawo uyaduka.
Verse 3: Ubuwula bomuntu buchitha indlela yakhe, kepha inhliziyo yakhe iyamthukuthelela uJehova.
Verse 4: Imfuyo iyenezela abangane abaningi, kepha ompofu uyashiywa ngumngane wakhe.
Verse 5: Ufakazi wamanga akayekwa, nophafuza amanga akayikusinda.
Verse 6: Baningi abancenga izikhulu; bonke bangabangane bomuntu wezipho.
Verse 7: Bonke abazalwane bompofu bayamzonda; kakhulu kangakanani abangane badedela kude naye; uyabaxosha ngamazwi, kepha awasekho.
Verse 8: Ozuza ukuqonda uthanda umphefumulo wakhe; ogcina ingqondo uyakufumana okuhle.
Verse 9: Ufakazi wamanga akayekwa, nophafuza amanga uyakubhubha.
Verse 10: Ukutamasa akufanele isiwula; kakhulu kangakanani akufanele ukuba inceku ibuse phezu kwezikhulu.
Verse 11: Ukuhlakanipha komuntu kubambezela intukuthelo yakhe; kuludumo lwakhe ukudlula esiphambekweni.
Verse 12: Ukufutheka kwenkosi kunjengokubhonga kwengonyama, kepha isihhe sayo sinjengamazolo etshanini.
Verse 13: Indodana eyisiwula iyinhlupheko kayise, nokuxabana komfazi kungukuconsa njalonjalo.
Verse 14: Indlu nemfuyo kuyifa elivela koyise, kepha umfazi ohlakaniphileyo uvela kuJehova.
Verse 15: Ubuvila bushonisa ebuthongweni obunzima, nesidenge siyalamba.
Verse 16: Ogcina umyalo ulonda umphefumulo wakhe, kepha onganaki izindlela zakhe uyakufa.
Verse 17: Onomusa kompofu utsheleka uJehova, nomsebenzi wakhe uyawubuyisela kuye.
Verse 18: Yilaye indodana yakho, lisekhona ithemba; ungabhekisi inhliziyo yakho ukuyibulala.
Verse 19: Onolaka olukhulu uyathweswa ihlawulo, ngokuba uma umophula, umelwe ukukuphinda.
Verse 20: Yizwa isiluleko, wamukele ukulaywa, ukuze uhlakaniphe ekugcineni.
Verse 21: Kukhona amacebo amaningi enhliziyweni yomuntu, kepha isiluleko sikaJehova siyakuma.
Verse 22: Ukuthandwa komuntu kubangwa ngumusa wakhe; ompofu ungcono kunomuntu wamanga.
Verse 23: Ukumesaba uJehova kungokokuphila; onakho uhlezi anelisiwe, akahanjelwa ngububi.
Verse 24: Ivila liyafaka isandla salo esitsheni; alisibuyiseli nasemlonyeni walo.
Verse 25: Shaya isideleli, ongenalwazi uyakuthola ukuqonda; sola oqondileyo, uyakuqonda ukwazi.
Verse 26: Ochitha uyise noxosha unina uyindodana ehlazisayo nebanga amahloni.
Verse 27: Yeka, ndodana yami, ukulalela ukulaywa, uyakuduka emazwini okwazi.
Verse 28: Ufakazi omubi uyadelela ukwahlulela; umlomo wababi uyagwinya ukona.
Verse 29: Izahlulelo zilungiselwa izideleli, nemivimbo umhlane weziwula.