Verse 1: Amazwi ka-Aguri, indodana kaJakhe waseMasa. Yathi indoda ku-Ithiyeli, ko-Ithiyeli no-Ukhali:
Verse 2: “Impela ngiyisiwula kunabanye abantu, anginakuqonda komuntu.
Verse 3: Angifundanga ukuhlakanipha, ukuze ngazi oNgcwele.
Verse 4: Ngubani owenyukele ezulwini, wabuye wehla na? Ngubani oqoqele umoya ezandleni zakhe na? Ngubani obophile amanzi engutsheni yakhe na? Ngubani omisile yonke imikhawulo yomhlaba na? Ngubani igama lakhe, ngubani igama lendodana yakhe, uma ulazi, na?
Verse 5: “Onke amazwi kaNkulunkulu acwebile; uyisihlangu kwabaphephela kuye.
Verse 6: Ungenezeli emazwini akhe, funa akusole, ufunyanwe ungumqambimanga.
Verse 7: “Yizinto ezimbili engizicela kuwe: unganginqabeli nazo, ngingakafi.
Verse 8: Dedisela kude nami okuyize namanga, unganginiki ubumpofu nengcebo, kepha ngiphe isinkwa engisimiselweyo,
Verse 9: funa ngisuthe, ngikuphike ngithi: ‘UJehova ungubani na?’ funa ngibe mpofu, ngebe, ngilone igama likaNkulunkulu wami.
Verse 10: “Ungahlebi inceku enkosini yayo, funa ikuthuke, ube necala.
Verse 11: “Kukhona isizukulwane esithuka uyise, esingabusisi unina.
Verse 12: Kukhona isizukulwane esimhlophe emehlweni aso, esingahlanzwanga ensileni yaso.
Verse 13: Kukhona isizukulwane yeka ukuzidla kwaso! Nezinkophe zaso ziphakanyisiwe.
Verse 14: Kukhona isizukulwane esimazinyo aso ayizinkemba namazinyo emihlathi angomese bokuqeda abampofu emhlabeni, nabaswelayo phakathi kwabantu.
Verse 15: “Umnyundu unamadodakazi amabili athi: ‘Siphe, siphe.’ “Kukhona izinto ezintathu ezingasuthi, nezine ezingasho ukuthi: ‘Kwanele!’:
Verse 16: indawo yabafileyo, nesizalo esiyinyumba, nomhlaba ongasuthi ngamanzi, nomlilo ongasho ukuthi: ‘Kwanele!’
Verse 17: “Iso eliklolodela uyise nelidelela ukulalela unina liyakukhishwa ngamagwababa angasemfuleni, lidliwe ngamazinyane okhozi.
Verse 18: “Kukhona izinto ezintathu ezingahlula ngokumangalisa, yebo, ezine engingazaziyo:
Verse 19: indlela yokhozi emoyeni, nendlela yenyoka edwaleni, nendlela yomkhumbi phakathi kolwandle, nendlela yendoda entombini.
Verse 20: “Inje indlela yowesifazane ophingayo: uyadla, abesesula umlomo wakhe, athi: ‘Angenzanga isono.’
Verse 21: “Phansi kwezinto ezintathu umhlaba uyazamazama, yebo, phansi kwezine ongezithwale:
Verse 22: phansi kwenceku ekubekweni kwayo inkosi, nesiwula uma sisuthile ngokudla,
Verse 23: naphansi kwesaliwakazi ekuganeni kwaso, nencekukazi ekulidleni ifa lenkosikazi yayo.
Verse 24: “Kukhona izinto ezine ezincane emhlabeni, kepha zihlakaniphile kakhulu:
Verse 25: izintuthwane ziyisizwe esingenamandla, kanti ziyalungisa ukudla kwazo ehlobo;
Verse 26: izimbila ziyisizwe esibuthakathaka, kanti ziyakha izindlu zazo edwaleni;
Verse 27: izinkumbi azinankosi, kanti ziyaphuma zonke ngamaviyo;
Verse 28: isibankwa ungasibamba ngezandla zombili, kanti sisendlini yenkosi.
Verse 29: “Kukhona izinto ezintathu ezinyathela ngesizotha, yebo, ezine ezihamba ngesithunzi:
Verse 30: ingonyama, iqhawe ezilwaneni; ayihlehli nakusiphi;
Verse 31: nehhashi lempi kanye nempongo, nenkosi phambi kwempi yayo.
Verse 32: “Uma wenzile ubuwula ngokuziphakamisa. wacabanga okubi, beka isandla emlonyeni wakho.
Verse 33: Ngokuba ukuphehla ubisi kuveza iphehlwa, nokucindezelwa kwempumulo kuveza igazi; kanjalo ukucindezela ulaka kuveza ukuxabana.”