Verse 1: Ndodana yami, uma uyisibambiso somakhelwane wakho, uma uxhawulene nomfokazi,
Verse 2: ucushiwe ngamazwi omlomo wakho, ubanjiwe ngamazwi omlomo wakho,
Verse 3: yenza lokhu phela, ndodana yami, uzophule, lokhu ungene esandleni somakhelwane wakho: khothama phambi kwakhe, umncengisise.
Verse 4: Unganiki amehlo akho ubuthongo, nezinkophe zakho ukozela.
Verse 5: Zophule njengensephe kumzingeli nanjengenyoni esandleni somthiyi wezinyoni.
Verse 6: Yana entuthwaneni, vilandini, ubone izindlela zayo, uhlakaniphe,
Verse 7: yona ethi ingenamahluleli, nambonisi, nambusi,
Verse 8: ilungisa nokho ehlobo isinkwa sayo, ibuthe ngesikhathi sokuvuna ukudla kwayo.
Verse 9: Uyakulala kuze kube nini, vilandini? Uyakuvuka nini ebuthongweni bakho na?
Verse 10: Ubuthongo obuncane, ukozela okuncane, ukusonga izandla kancane kuze kulalwe,
Verse 11: bese kuthi ubumpofu bakho bufike njengomhambuma, nokuswela kwakho njengomuntu wesihlangu.
Verse 12: Umuntu omubi, umuntu wokona, nguye ohamba nomlomo ophambeneyo,
Verse 13: oqwayiza amehlo, eshudula ngezinyawo zakhe, ekhomba ngeminwe.
Verse 14: Ubuphoxo busenhliziyweni yakhe; uceba okubi ngesikhathi sonke; ususa ukuxabana.
Verse 15: Ngalokho ingozi yakhe iyakufika ngokuzumayo; ngokuphazima kweso uyakwaphulwa, kungabikho ukuphiliswa.
Verse 16: Kukhona izinto eziyisithupha azizondayo uJehova, yebo, eziyisikhombisa eziyizinengiso emphefumulweni wakhe:
Verse 17: amehlo azidlayo, nolimi lwamanga, nezandla ezichitha igazi elingenacala,
Verse 18: nenhliziyo eceba imicabango emibi, nezinyawo ezishesha ukugijimela ebubini,
Verse 19: nofakazi wamanga ophafuza inkohliso, obanga ukuxabana phakathi kwabazalwane.
Verse 20: Ndodana yami, gcina umyalo kayihlo, ungawushiyi umthetho kanyoko.
Verse 21: Yibophe enhliziyweni yakho njalo, uyithekeleze entanyeni yakho.
Verse 22: Mayikuhole ekuhambeni kwakho, ikulondoloze ekulaleni kwakho, ikhulume kuwe ekuvukeni kwakho.
Verse 23: Ngokuba imiyalo iyisibani, nomthetho ungukukhanya, nokusola ngokulaya kuyindlela yokuphila,
Verse 24: ukuze ugcinwe kowesifazane omubi, nasekuthopheni kolimi lowesifazane ondindayo.
Verse 25: Ungakhanuki ubuhle bakhe enhliziyweni yakho, angakubambi ngezinkophe zakhe.
Verse 26: Ngokuba intengo yowesifazane oyisiphingi iyiqebelengwane lesinkwa, kepha umfazi womuntu uzingela umphefumulo onqabileyo.
Verse 27: Umuntu angaphatha umlilo esifubeni sakhe, izingubo zakhe zingashi, na?
Verse 28: Umuntu angahamba phezu kwamalahle avuthayo, izinyawo zakhe zingahanguki, na?
Verse 29: Unjalo yena ongena kumkamakhelwane: akuyikuthiwa ongenacala noma yimuphi omthintileyo.
Verse 30: Abamdeleli yini oyisela ukuthi uyeba ukuba azisuthise lapho elambile na?
Verse 31: Uma efunyanwa, uyakubuyisa kasikhombisa, anikeze yonke impahla yendlu yakhe.
Verse 32: Ophinga nowesifazane akanakho ukuqonda; wenza lokho okuchitha umphefumulo wakhe.
Verse 33: Uyakuthola imivimbo nehlazo, nenhlamba yakhe ayiyikwesulwa.
Verse 34: Ngokuba isikhwele sendoda singukufutheka; ayiyikuyeka ngosuku lokuphindisela.
Verse 35: Ayiyikunaka neze ihlawulo; ayaneliswa, noma uphana ngezipho eziningi.