Verse 1: Ukuhlakanipha akumemezi yini, nokuqonda akukhiphi izwi lakho na?
Verse 2: Kumi esiqongweni sezindawo eziphakemeyo, ngasendleleni phakathi kwemikhondo.
Verse 3: Ngaseceleni kwamasango, ngasekungeneni komuzi, lapho kungenwa ngeminyango, kuyamemeza ngokuthi:
Verse 4: “Ngiyanibiza nina madoda; izwi lami likumadodana abantu.
Verse 5: Qondani ukuhlakanipha nina eningenalwazi; nani ziwula, manibe nenhliziyo eqondileyo.
Verse 6: Zwanini, ngokuba ngiyakulanda okukhulu; ukukhamisa kwezindebe zami kuyakuba ngokulungileyo.
Verse 7: Ngokuba umlomo wami uyakukhuluma iqiniso; ububi buyisinengiso ezindebeni zami.
Verse 8: Onke amazwi omlomo wami asekulungeni; akukho okuyisigwegwe nokuphambeneyo kuwo.
Verse 9: Aqondile onke koqondayo; alungile kothola ukwazi.
Verse 10: Yamukelani ukufundisa kwami kunesiliva, nokwazi kunegolide elikhethekileyo.
Verse 11: Ngokuba ukuhlakanipha kuhle kunamarubi, nakho konke okungafiswa akunakulinganiswa nakho.
Verse 12: Mina kuhlakanipha ngakhile ekuqondeni, ngithola ukwazi namasu.
Verse 13: Ukumesaba uJehova kungukuzonda okubi; ukuzidla, nokuzikhukhumeza, nendlela embi, nomlomo wobuphoxo, ngiyakuzonda.
Verse 14: Kimina kukhona ukululeka nempumelelo; ngingukuqonda, nginamandla.
Verse 15: Amakhosi abusa ngami, nababusi bamisa ukulunga.
Verse 16: Izikhulu zibusa ngami, namakhosana, bonke abahluleli bomhlaba.
Verse 17: Ngiyathanda abangithandayo; abangifunayo bayakungifumana.
Verse 18: Ingcebo nodumo kukimi, ukunotha okumiyo nokulunga.
Verse 19: Isithelo sami sihle kunegolide, kunegolide elicwengekileyo, nenzuzo yami kunesiliva elikhethekileyo.
Verse 20: Ngiyahamba endleleni yokulunga, phakathi kwemikhondo yokwahlulela,
Verse 21: ukuze ngenze abangithandayo badle ifa lemfuyo, ngigcwalise izindlu zabo zengcebo.
Verse 22: “UJehova wangidala ngingukuqala kwendlela yakhe ngaphambi kwemisebenzi yamandulo.
Verse 23: Ngamiswa kwaphakade kwasekuqaleni, umhlaba ungakabikho.
Verse 24: Lungakabikho utwa ngazalwa, ingakabikho imithombo egcwele amanzi.
Verse 25: Zingakasekelwa izintaba, namagquma engakabikho, ngazalwa,
Verse 26: engakawenzi umhlaba namasimu, nokuqala kothuli lwezwe.
Verse 27: Ekulungiseni kwakhe izulu ngangikhona, nasekudwebeni kwakhe umkhathi ebusweni botwa.
Verse 28: Lapho enza ukuba isibhakabhaka phezulu siqine, nemithombo yotwa iphuphume ngamandla,
Verse 29: lapho emisela ulwandle umncele, ukuze amanzi angeqi izwi lakhe, nalapho emisa izisekelo zomhlaba,
Verse 30: khona nganginaye ngiyingcweti yomsebenzi, ngiyintokozo yakhe imihla ngemihla, ngijabula phambi kwakhe isikhathi sonke,
Verse 31: ngijabula ezweni lomhlaba wakhe, intokozo yami ikanye namadodana abantu.
Verse 32: “Ngalokho, bantwana, ngizweni, ngokuba babusisiwe abagcina izindlela zami.
Verse 33: Yizwani ukulaya, nihlakaniphe, ningakwenqabi.
Verse 34: Ubusisiwe umuntu ongizwayo, elinda imihla ngemihla ngasemasangweni ami, ehlala ngasezinsikeni zeminyango yami.
Verse 35: Ngokuba ongifumanayo, ufumana ukuphila, azuze umusa kuJehova.
Verse 36: Ongangifumani uyona umphefumulo wakhe; bonke abangizondayo bathanda ukufa.”