Verse 1: Lapho uhlezi ekudleni nombusi, qonda nokuqonda ophambi kwakho,
Verse 2: ubeke umese emphinjeni wakho, uma ungumuntu wephango.
Verse 3: Unganxaneli izilovela zakhe, lokhu zingukudla okukhohlisayo.
Verse 4: Ungakhandlekeli ukuceba; kuyeke ngokuqonda kwakho.
Verse 5: Amehlo akho ayandizela kulokho, kepha akusekho, ngokuba kuyazenzela impela amaphiko njengokhozi olundizela ezulwini.
Verse 6: Ungadli ukudla koneso elibi, ungafisi izilovela zakhe,
Verse 7: ngokuba unjengozicabangelayo; uthi kuwe: “Yidla uphuze,” kepha inhliziyo yakhe ayikho kuwe.
Verse 8: Umthamo owudlileyo uyakuwuhlanza, uchithe amazwi akho amnandi.
Verse 9: Ungakhulumi ezindlebeni zesiwula, ngokuba siyakudelela ukuhlakanipha kwamazwi akho.
Verse 10: Ungasusi isikhonkwane esidala, ungangeni emasimini ezintandane,
Verse 11: ngokuba umhlengi wazo unamandla; uyakumela indaba yazo kuwe.
Verse 12: Beka inhliziyo yakho ekulayweni, nezindlebe zakho emazwini okwazi.
Verse 13: Ungayeki ukumlaya umntwana, ngokuba uma umshaya ngoswazi akayikufa.
Verse 14: Uyakumshaya ngoswazi, wophule umphefumulo wakhe endaweni yabafileyo.
Verse 15: Ndodana yami, uma inhliziyo yakho ihlakanipha, inhliziyo yami iyakuthokoza, yebo, eyami.
Verse 16: Izinso zami ziyakujabula, lapho izindebe zakho zikhuluma okulungileyo.
Verse 17: Inhliziyo yakho mayingabi namhawu ngezoni, kepha mawube sekumesabeni uJehova usuku lonke.
Verse 18: Ngokuba impela umvuzo ukhona, nethemba lakho aliyikunqunywa.
Verse 19: Yizwa wena ndodana yami, uhlakaniphe, uhole inhliziyo yakho ngendlela.
Verse 20: Ungabi phakathi kwezinseli zewayini nabayiziminzi zenyama.
Verse 21: Ngokuba inseli noyisiminzi bayakuba mpofu; ukozela kuyakwembathisa umuntu amanikiniki.
Verse 22: Lalela uyihlo owakuzalayo, ungamdeleli unyoko lapho esemdala.
Verse 23: Thenga iqiniso, ungathengisi ngalo, nokuhlakanipha, nokulaywa, nokuqonda.
Verse 24: Uyise wolungileyo uyakwethaba nokwethaba, nozala ohlakaniphileyo uyathokoza ngaye.
Verse 25: Mabathokoze uyihlo nonyoko, ethabe owakubelethayo.
Verse 26: Ndodana yami, ngiphe inhliziyo yakho, amehlo akho enamele izindlela zami.
Verse 27: Ngokuba isifebe singumgodi ojulileyo, nowesifazane ondindayo ungumhholo onyinyeneyo.
Verse 28: Uqamekela njengomphangi; uyandisa abambuluzayo phakathi kwabantu.
Verse 29: Ngubani othi: “Maye!” Ngubani othi: “Wo!” Ngubani oxabanayo? Ngubani okhalayo, ngubani onezilonda ngeze, na? Ngubani onamehlo aklwelayo na?
Verse 30: Yibo abalibala ngasewayinini, abaya ukunambitha iwayini elixutshanisiweyo.
Verse 31: Ungalibuki iwayini ukuthi libomvu, nokuthi liyacwebezela endebeni, ukuba lehle kalula.
Verse 32: Ngasekugcineni liyaluma njengenyoka, lihlabe njengebululu.
Verse 33: Amehlo akho ayakubona imihlola, inhliziyo yakho ikhulume okuphambeneyo.
Verse 34: Uyakuba njengolele ekujuleni kolwandle nohlezi esihlokweni sensika yomkhumbi.
Verse 35: Uyakuthi: “Bangishayile, angilimalanga; bangigalele, angikwazanga. Lapho ngivuka, ngiyakubuye ngilifune.”