Verse 1: Ndodana yami, lalela ukuhlakanipha kwami, ubeke indlebe yakho ekuqondeni kwami
Verse 2: ukuba ugcine amasu, nezindebe zakho zilonde ukwazi.
Verse 3: Ngokuba izindebe zowesifazane ondindayo ziconsa izinyosi; umlomo wakhe ubushelezi kunamafutha.
Verse 4: Kepha ekugcineni umunyu njengomhlonyane, ubukhali njengenkemba enezinhlangothi ezimbili.
Verse 5: Izinyawo zakhe ziyehlela ekufeni; izinyathelo zakhe zibambelela endaweni yabafileyo.
Verse 6: Akanaki umkhondo wokuphila; imikhondo yakhe iyaguquguquka, engazi.
Verse 7: Ngalokho, madodana ami, ngizweni, ningachezuki emazwini omlomo wami.
Verse 8: Dedisela kude naye indlela yakho, ungasondeli emnyango wendlu yakhe,
Verse 9: funa unike abanye udumo lwakho, naye ononya iminyaka yakho,
Verse 10: funa abezizwe basuthe ngamandla akho, umshikashika wakho ube sendlini yomfokazi,
Verse 11: uze ububule ekugcineni, lapho umzimba wakho nenyama yakho kuqediwe,
Verse 12: ngokuthi: “Yeka ukuzonda kwami ukulaywa nokudelela kwenhliziyo yami ukusolwa!
Verse 13: Angilalelanga izwi labafundisi bami, angibekanga indlebe yami kubo abangifundisayo.
Verse 14: Ngacishe ngaba sebubini bonke phakathi kwebandla nasemhlanganweni.”
Verse 15: Phuza amanzi emgodini wakho, amanzi agobhozayo emthonjeni wakho.
Verse 16: Imithombo iyaphalala ngaphandle yini, nemifula yamanzi ezigcawini, na?
Verse 17: Mayibe ngeyakho wena wedwa, ingabi ngeyabafokazi kanye nawe.
Verse 18: Mawubusiswe umthombo wakho, uthokoze ngomfazi wobusha bakho.
Verse 19: Uyindluzelekazi ethandayo negogokazi elihle; amabele akhe mawakudelise ngesikhathi sonke, weqiwe njalo luthando lwakhe.
Verse 20: Ubuyakweqelwani ngowesifazane ondindayo, ndodana yami, ugone isifuba somfokazi, na?
Verse 21: Ngokuba izindlela zomuntu ziphambi kwamehlo kaNkulunkulu; uyenza yonke imikhondo yakhe ukuba ilingane.
Verse 22: Omubi uyakubanjwa ngububi bakhe, abhajwe ngezintambo zezono zakhe.
Verse 23: Uyakufa yena ngokuswela ukulaywa, nangobuningi bobuwula bakhe uyakuduka.