Verse 1: Wayesethatha uSofari umNahama, wathi:
Verse 2: “Ngalokho imicabango yami iyangiphendula ngenxa yokushesha okuphakathi kwami.
Verse 3: Ngiyezwa insolo engihlazisayo, kepha umoya wasengqondweni yami uyangiphendula.
Verse 4: “Awukwazi yini ukuba lokhu kungokwasendulo, selokhu abantu babekwa emhlabeni,
Verse 5: ukuthi ukujabula kwababi kufushane, nokuthokoza kwabangenaNkulunkulu kungokokuphazima kweso nje, na?
Verse 6: Noma ubukhulu bakhe bukhuphukela ezulwini, nekhanda lakhe lifinyelela emafwini,
Verse 7: uyakubhubha kuze kube phakade njengamasimba akhe; abambonayo bayakuthi: ‘Uphi na?’
Verse 8: Uyakundiza njengephupho, angabe esafunyanwa; uyakuxoshwa njengombono wasebusuku.
Verse 9: Iso elalimgqolozela alisamboni, nendawo yakhe ayisamboni.
Verse 10: Abantwana bakhe bayakuzincengela kwabampofu, izandla zakhe zibuyise impahla yakhe.
Verse 11: Amathambo akhe agcwele ubusha, kepha buyakulala phansi kanye naye othulini.
Verse 12: “Noma ububi bumnandi emlonyeni wakhe, noma ebufihla phansi kolimi lwakhe,
Verse 13: noma ebugodla engabushiyi, kepha ebugcina emlonyeni wakhe,
Verse 14: kuyaguquka nokho ukudla kwakhe phakathi kwakhe, kube yinyongo yamabululu ezibilinini zakhe.
Verse 15: Ugwinyile ingcebo; uyakubuye ayihlanze; uNkulunkulu uyakuyikhipha esiswini sakhe.
Verse 16: Uyakumunca isihlungu samabululu; ulimi lwenyoka luyakumbulala.
Verse 17: Akayikubuka imifula, iminonjana nemifudlana yezinyosi namangqanga.
Verse 18: Lokho owakukhandlekelayo uyakukubuyisa, angakugwinyi; ngempahla ayitholileyo akayikujabula.
Verse 19: Ngokuba ucindezele, washiya abampofu; uhlwithile indlu, angabuye ayakhe.
Verse 20: “Ngokuba wayengazi ukuthula esiswini sakhe; kayikuphepha nalutho kulokho akufisayo.
Verse 21: Akusalanga lutho angaludlanga; ngalokho inhlanhla yakhe ayiyikuma.
Verse 22: Ekusutheni kokuvama kwakhe uyaminywa; izandla zakho konke ukuhlupheka ziyakumfikela.
Verse 23: Kuyakuthi lapho eyakugcwalisa isisu sakhe, uNkulunkulu aphonse kuye ukuvutha kwentukuthelo yakhe, akunise phezu kwakhe esekudleni.
Verse 24: Uyabalekela isikhali sensimbi, kepha ubhotshozwa ngumnsalo wethusi.
Verse 25: Uyawukhipha uphume emzimbeni wakhe; nxa uphuma unyampuza enyongweni, abesehlelwa yingebhe.
Verse 26: Ubumnyama bonke bubekelelwe ingcebo yakhe; umlilo ongavuthelwanga uyakuyidla, uchithe okusele etendeni lakhe.
Verse 27: Izulu liyakwambula ububi bakhe, umhlaba umvukele.
Verse 28: Imfuyo yendlu yakhe iyakumuka, inyamalale ngomuhla wentukuthelo.
Verse 29: Lesi siyisabelo somuntu omubi esivela kuNkulunkulu, nefa alinqunyelweyo nguNkulunkulu.”