Verse 1: Wayesephendula uJobe ethi:
Verse 2: “Ngeqiniso ngiyazi ukuthi kunjalo, kepha umuntu angaba elungile phambi kukaNkulunkulu na?
Verse 3: Uma efuna ukuthetha amacala naye, angemphendule nakwelilodwa kwayinkulungwane.
Verse 4: Ehlakaniphile enhliziyweni, eqinile emandleni, ngubani oziqinisele kuye, waphumelela,
Verse 5: yena ogudluza izintaba ngokungazeleli, ezigumbuqela ngentukuthelo yakhe;
Verse 6: ozamazamisa umhlaba usuke endaweni yawo, kuthuthumele izinsika zawo;
Verse 7: oyala ilanga lingaphumi, avalele izinkanyezi;
Verse 8: oweneka izulu yedwa, ahambe emazeni olwandle;
Verse 9: owenza iBhere, neMpambano, nesiLimela, namaKamelo aseningizimu;
Verse 10: owenza izinto ezinkulu ezingenakuhlolwa, yebo, izimangaliso ezingenakubalwa.
Verse 11: Bheka, uyangidlula, ngingaboni; uyagudla, ngingezwa.
Verse 12: Bheka, uyabamba; ngubani ongamkhalima na? Ngubani ongasho kuye ukuthi: ‘Wenzani na?’
Verse 13: “UNkulunkulu akayikubuyisa intukuthelo yakhe; phansi kwakhe bayakhothama abasizi bakaRahabi.
Verse 14: Pho, mina ngingamphendula ngithini, ngikhethe amazwi ami aqondene naye, na?
Verse 15: Noma bengilungile, bengingenakumphendula, kepha nginxuse umahluleli wami.
Verse 16: Uma bengimbizile abesengiphendula, bengingayikukholwa nokho ukuthi ubekile indlebe ezwini lami.
Verse 17: Uyangilimaza ngesiphepho; uyandisa amanxeba ami ngeze.
Verse 18: Kavumi ukuba ngiphefumule, kepha uyangigcwalisa ngomunyu.
Verse 19: Uma kuyindaba yamandla, nangu onawo; uma yindaba yokwahlulela, ngubani ongimemayo na?
Verse 20: Noma ngilungile, umlomo wami uyakungilahla; noma ngingenacala, uyakuthi ngonakele.
Verse 21: Anginasici; anginakekeli umphefumulo wami; anginanzi ukuphila kwami.
Verse 22: Ukuphela kunye nje; ngalokho ngithi: ‘Uyaqeda ongenasici kanye nomubi.’
Verse 23: Uma isiswebhu sibulala ngokuzumayo, uyahleka ingozi yabangenacala.
Verse 24: Umhlaba unikezwe esandleni sababi; uyasibekela ubuso babahluleli bawo; uma kungesiye, pho, ngubani na?
Verse 25: “Imihla yami iyashesha kunesigijimi; iyabaleka ingabonanga okuhle.
Verse 26: Itshuza njengomkhunjana womhlanga, njengokhozi olutheleka empangweni.
Verse 27: Noma ngithi ngiyakukhohlwa ukukhala kwami, ngiyeke ukunyukubala kwami, ngincibilike,
Verse 28: ngiyesaba nokho bonke ubuhlungu bami, ngiyazi ukuthi awuyikungibheka nginjengongenacala.
Verse 29: Ngiyakulahlwa mina; ngikhandlekelani ize na?
Verse 30: Noma ngizigeza ngamanzi eqhwa, ngihlambe izandla zami ngensipho,
Verse 31: uyakungicwilisa nokho emgodini, izingubo zami zinengwe yimi.
Verse 32: Ngokuba akasiye umuntu onjengami ukuba ngingase ngimphendule, siye kanyekanye ekwahlulelweni.
Verse 33: Akukho mnqamulajuqu phakathi kwethu ongabeka isandla sakhe phezu kwethu sobabili.
Verse 34: Makayisuse induku yakhe kimi; ingebhe ngaye mayingangesabisi.
Verse 35: Khona ngiyakukhuluma, ngingamesabi, ngokuba anginjalo ngokwami.