Verse 1: “Ake umemeze; ukhona okuphendulayo na? Uyakuphendukela kumuphi kwabangcwele na?
Verse 2: Ngokuba isiwula siyabulawa ngukukhathazeka, nomhawu uyachitha oyisiphukuphuku.
Verse 3: Mina ngibonile isiwula sigxilile, kepha ngaqalekisa indlu yaso ngokuzumayo.
Verse 4: Abantwana baso bakude nokusindiswa, bachotshozwa esangweni; akakho obophulayo,
Verse 5: abakuvuna kwabo kudliwa ngabalambileyo, bakukhipha nasemeveni; abanxanelayo basezela impahla yabo.
Verse 6: Ngokuba usizi aluveli othulini, nokuhlupheka akuphumi emhlabathini,
Verse 7: ngokuba umuntu uzalelwa ukuhlupheka, njengokuba izinhlansi ziqhashela phezulu.
Verse 8: “Kodwa mina bengiyakumfuna uNkulunkulu; kuNkulunkulu bengiyakubeka indaba yami,
Verse 9: yena owenza izinto ezinkulu ezingaphenyekiyo, izimangaliso ezingenakubalwa,
Verse 10: yena onisa imvula emhlabeni, athume amanzi ebusweni bamasimu,
Verse 11: ukuze aphakamise abayizimpofana nabadabukileyo baphakanyiselwe ukusindiswa.
Verse 12: Uyachitha amacebo abanobuqili, ukuze izandla zabo zingabi nakufeza umgomo wabo.
Verse 13: Uyabamba abahlakaniphileyo ebuqilini babo; isiluleko soyisigwegwe siyachithwa ngokuphuthuma.
Verse 14: Emini bahlangana nobumnyama, baphumputha emini njengasebusuku.
Verse 15: Uyasindisa enkembeni yemilomo yabo, yebo, abampofu esandleni sonamandla.
Verse 16: Ompofu usenethemba; ububi buvala umlomo wabo.
Verse 17: “Bheka, ubusisiwe lowo muntu uNkulunkulu amlayayo; ngalokho ungadeleli ukukhuzwa nguSomandla.
Verse 18: Ngokuba uma ezwisa ubuhlungu, ubuye abophe; uyalimaza, kepha izandla zakhe zibuye zelaphe.
Verse 19: Uyakophula ezinhluphekweni eziyisithupha; yebo, nakweziyisikhombisa awuyikuthintwa ngokubi.
Verse 20: Endlaleni uyakukuhlenga ekufeni nasempini emandleni enkemba.
Verse 21: Uyakufihlwa enkalivasini yolimi; awuyikwesaba lapho kufika ukuchitha.
Verse 22: Uyakuhleka incithakalo nendlala, nezilo zomhlaba awuyikuzesaba.
Verse 23: Ngokuba unesivumelwano namatshe asendle; izilo zasendle zihlalisana kahle nawe.
Verse 24: Uyakwazi ukuthi itende lakho linokuthula; uyakuhambela indlu yakho, awuyikusilalelwa lutho.
Verse 25: Uyakwazi ukuthi inzalo yakho iyakuba nkulu, abantwana bakho babe njengotshani bomhlaba.
Verse 26: Uyakufika ethuneni usuthi ngobudala njengeqhinqa lamabele ngesikhathi salo.
Verse 27: Bheka, lokho sikuphenyile; kunjalo; kuzwe, uzazele khona.”