Verse 1: U-Elihu waqhubeka wathi:
Verse 2: “Ngihlalele kancane, ngiyakukubonisa, ngokuba ngisenamazwi okummela uNkulunkulu.
Verse 3: Ngiyakulanda kude ulwazi lwami, nginike uMenzi wami ukulunga.
Verse 4: Impela amazwi ami awasiwo amanga; unawe ophelele ekwazini.
Verse 5: “Bheka, uNkulunkulu unamandla, kepha kadeleli muntu; mkhulu emandleni okuqonda.
Verse 6: Akenzi ukuba omubi aphile, kepha abampofu uyabanika ukwahlulelwa.
Verse 7: Akabuyisi amehlo akhe kwabalungileyo, kepha ubahlalisa namakhosi ezihlalweni zobukhosi, baphakame kuze kube phakade.
Verse 8: Uma beboshwa ngamaketanga, babanjwe ngezintambo zokuhlupheka,
Verse 9: uyababonisa izenzo zabo neziphambeko zabo zokuthi baziphakamisile.
Verse 10: Uyavulela izindlebe zabo ukulaywa, asho ukuba babuye ebubini.
Verse 11: Uma belalela, bamkhonze, bayakuqeda imihla yabo ebuhleni neminyaka yabo kukho okumnandi.
Verse 12: Kepha uma bengalaleli, bayakuphela ngenkemba, bafe bengenalwazi.
Verse 13: “Abangesabi ngenhliziyo baqongelela ulaka; abakhali lapho ebabopha.
Verse 14: Bafa besebasha, ukuphila kwabo kube njengokwezifebe zethempeli.
Verse 15: Ukhulula ompofu ngobumpofu bakhe, avule indlebe yabo ngokuhlupheka.
Verse 16: “Yebo, nga ekuvusa ukuba uphume emlonyeni wosizi, uye endaweni ebanzi, lapho kungekho kunyinyeka khona, kunone okubekwa etafuleni lakho.
Verse 17: Kepha ugcwele ukwahlulelwa kwababi; ukwahlulela nokulunga kuyakubamba.
Verse 18: Xwaya ukuba ulaka lungakuvusi usashaywa, ungachezukiswa ngobuningi bamahlawulo.
Verse 19: Ukukhala kwakho kungakusiza ukuba ungahlali osizini, nazo zonke izikhwepha zamandla akho, na?
Verse 20: Ungafisi ubusuku, lapho abantu beyakususwa ezindaweni zabo.
Verse 21: Xwaya ukuba ungabhekisi ubuso bakho ebubini, ngokuba ukhethile lokho kunokuhlupheka.
Verse 22: “Bheka, uNkulunkulu uphakeme ngamandla akhe; ngubani ofundisa njengaye na?
Verse 23: Ngubani ommisele indlela yakhe na? Ngubani ongasho ukuthi: ‘Wenzile okubi,’ na?
Verse 24: Khumbula ukukhulisa izenzo zakhe abahlabelela ngazo abantu.
Verse 25: Bonke abantu bayazibona; abokufa bayazibuka besekude.
Verse 26: Bheka, uNkulunkulu uphakeme, asimqondi; umumo weminyaka yakhe ayinakuphenywa.
Verse 27: “Wenyusa amathonsi amanzi, abuye awathulule njengemvula enkungwini yakhe;
Verse 28: amafu awenza ukuba aconse, awathele phezu kwabantu abaningi.
Verse 29: Ukhona ongaqonda ukwenekeka kwamafu nokuduma kwedokodo lakhe na?
Verse 30: Bheka, uyasakaza ukukhanya kwakhe ngakuye; uyasibekela ubuphansi bolwandle.
Verse 31: Ngokuba ngalokho uyabahlulela abantu, aphane kakhulu ngokudla.
Verse 32: Uyasibekela izandla zakhe ngokukhanya, akuyale ukuba kushaye isigcibisholo.
Verse 33: Umsindo wakhe ulanda ngaye oshisekela ububi ngentukuthelo.