Verse 1: Lawo madoda amathathu ayeseyeka ukumphendula uJobe, ngokuba wayelungile emehlweni akhe.
Verse 2: Lwase luvutha ulaka luka-Elihu, indodana kaBarakeli, umBuzi womndeni kaRamu; ulaka lwakhe lwavuthela uJobe, ngokuba wazithetha yena kunoNkulunkulu.
Verse 3: Ulaka lwakhe lwavuthela nabangane bakhe abathathu, ngokuba noma bengafumananga impendulo, bamlahla nokho uJobe.
Verse 4: U-Elihu wayelindele ukukhuluma kuJobe, ngokuba bona babebadala kunaye.
Verse 5: Lapho u-Elihu esebona ukuthi ayikho impendulo emilonyeni yalawo madoda amathathu, lwavutha ulaka lwakhe.
Verse 6: U-Elihu, indodana kaBarakeli, umBuzi, wayesethatha-ke, wathi: “Mina ngisemusha ngeminyaka, nina nibadala; ngalokho nganginamahloni, ngesaba ukunitshela umqondo wami.
Verse 7: Ngathi: ‘Makukhulume izinsuku, ubuningi beminyaka bazise ukuhlakanipha.’
Verse 8: Nokho kukhona umoya kumuntu; ukuphefumula kukaSomandla kuyabaqondisa.
Verse 9: Abakhulu abahlakaniphile, nabadala abaqondi ukwahlulela.
Verse 10: “Ngalokho ngithi: Ngizweni; nami ngiyakusho umqondo wami.
Verse 11: Bhekani, ngilindele amazwi enu, ngabeka indlebe emiqondweni yenu, nisaphenya eniyakukusho.
Verse 12: Nganilalela nina; bhekani, kwakungekho noyedwa owamahlula uJobe nowaphendula amazwi akhe phakathi kwenu.
Verse 13: Maningasho ukuthi: ‘Sifumene ukuhlakanipha; uNkulunkulu angamphengulula, hhayi umuntu.’
Verse 14: Akahlelelanga mina amazwi akhe; angiyikumphendula ngezinkulumo zenu.
Verse 15: “Bayakhungatheka, abasaphenduli; baphelelwa ngamazwi.
Verse 16: Ngibalindele yini, uma bengakhulumi, na? Ngokuba bemi bengasaphenduli.
Verse 17: Nami ngiyakuphendula okwami, ngitshengise nami umqondo wami.
Verse 18: Ngokuba ngigcwele amazwi; umoya phakathi kwami uyangiqhubezela.
Verse 19: Bhekani, okuphakathi kwami kunjengewayini elingenambobo; kucishe ukuqhuma njengezimvaba ezintsha.
Verse 20: Ngiyakukhuluma ukuba ngikhululeke; ngiyakuvula izindebe zami ukuba ngiphendule.
Verse 21: Mangingakhethi ubuso bamuntu, ngingathophi nobani.
Verse 22: Ngokuba angikwazi ukuthopha; uma kunjalo, uMenzi wami angangisusa masinyane.