Verse 1: Ungasiphi thina, Jehova, ungasiphi thina, kepha uliphe igama lakho inkazimulo ngenxa yomusa wakho nangenxa yeqiniso lakho.
Verse 2: Abezizwe bayakusho ngani ukuthi: “Uphi manje uNkulunkulu wabo na?”
Verse 3: Kepha uNkulunkulu wethu usezulwini; wenza konke akuthandayo.
Verse 4: Izithombe zabo ziyisiliva negolide, umsebenzi wezandla zomuntu.
Verse 5: Umlomo zinawo, kepha azikhulumi; amehlo zinawo, kepha aziboni.
Verse 6: Izindlebe zinazo, kepha azizwa; zinamakhala, kepha azihogeli.
Verse 7: Zinezandla, kepha aziphathi; zinezinyawo, kepha azihambi; azikhulumi ngomphimbo wazo.
Verse 8: Abazenzayo bayafana nazo, bonke abazethembayo.
Verse 9: Israyeli, themba kuJehova; yena ulusizo lwabo nesihlangu sabo.
Verse 10: O wena ndlu ka-Aroni, themba kuJehova; yena ulusizo lwabo nesihlangu sabo.
Verse 11: Nina enimesabayo uJehova thembani kuJehova; yena ulusizo lwabo nesihlangu sabo.
Verse 12: UJehova usikhumbulile; uyakubusisa, abusise indlu ka-Israyeli, abusise indlu ka-Aroni.
Verse 13: Uyakubusisa abamesabayo uJehova, abancane nabakhulu.
Verse 14: UJehova uyakunandisa, nina nabantwana benu.
Verse 15: Manibe ngababusisiweyo bakaJehova owenzile izulu nomhlaba.
Verse 16: Izulu liyizulu likaJehova, kepha umhlaba wawunika abantwana babantu.
Verse 17: Abafileyo abamdumnisi uJehova, qha, noyedwa kwabehlelayo ekuthuleni.
Verse 18: Kepha thina siyakumbonga uJehova kusukela kulesi sikhathi kuze kube phakade. Haleluya!