Verse 1: ElikaDavide. Ngikhala kuwe Jehova; Dwala lami, ungabi yisithulu kimi, funa kuthi, uma uthula kimi, ngifane nabashona emgodini.
Verse 2: Yizwa izwi lokunxusa kwami, nxa ngikhala kuwe, ngiphakamisela izandla zami endaweni yakho engcwelengcwele.
Verse 3: Ungangimukisi kanye nababi nabenza okubi abakhuluma ukuthula nabakhelwane babo, kanti kukhona okubi ezinhliziyweni zabo.
Verse 4: Banike njengokwenza kwabo nanjengobubi bemisebenzi yabo; banike njengokwenza kwezandla zabo, baphindisele abakwenzileyo.
Verse 5: Ngokuba abayinaki imisebenzi kaJehova nokwenza kwezandla zakhe; uyakubadiliza, angabakhi.
Verse 6: Makabongwe uJehova, ngokuba ulizwile izwi lokunxusa kwami.
Verse 7: UJehova ungamandla ami nesihlangu sami; inhliziyo yami ithembe kuye, ngasizwa; ngakho-ke inhliziyo yami iyethaba; ngizakumdumisa ngesihlabelelo sami.
Verse 8: UJehova ungamandla abantu bakhe; uyinqaba yensindiso yogcotshiweyo wakhe.
Verse 9: Sindisa abantu bakho, ubusise ifa lakho, ubaluse, ubathwale kuze kube phakade.