Verse 1: Kumholi wokuhlabelela. Indlela: Indluzelekazi yokusa. Ihubo likaDavide. Nkulunkulu wami, Nkulunkulu wami, ungishiyeleni na? Ukude namazwi okubububula kwami nokusindiswa kwami.
Verse 2: Nkulunkulu wami, ngikhala emini, kepha awuphenduli, nasebusuku, ngingabi nakuthula.
Verse 3: Kepha wena ungoNgcwele ohlezi ezibongweni zika-Israyeli.
Verse 4: Obaba bethu babekwethemba; babethemba, wena wabakhulula.
Verse 5: Bakhala kuwe, bakhululwa; bethemba wena, abaze bajabha.
Verse 6: Kepha mina ngiyimphethu, angisiye umuntu; ngiyisithuko sabantu, ngiyindelelo yabantu.
Verse 7: Bonke abangibonayo bayangiklolodela, baphukule imilomo, banikine amakhanda,
Verse 8: bathi: “Zinikele kuJehova; makamsindise, amkhulule, njengokuba emthanda.”
Verse 9: Impela nguwe owangikhipha esizalweni, wangikhoselisa ngasemabeleni kamame.
Verse 10: Ngaphonswa phezu kwakho kwasesizalweni; unguNkulunkulu wami kwasesizalweni sikamame.
Verse 11: Ungabi kude nami, ngokuba inhlupheko iseduze, nosizayo akakho.
Verse 12: Izinkunzi eziningi zingibunganyele, ezinamandla zaseBashani zingizungezile.
Verse 13: Zingikhamisele umlomo wazo njengengonyama edwengulayo nebhodlayo.
Verse 14: Ngichithiwe njengamanzi; onke amathambo ami enyele; inhliziyo yami injengengcina, incibilikile phakathi kwezibilini zami.
Verse 15: Amandla ami omile njengodengezi; ulimi lwami lunamathela olwangeni lwami; ungibeka othulini lokufa.
Verse 16: Ngokuba izinja ziyangibungayela; umbonda wababi ungizungezile; izandla zami nezinyawo zami bazibhobozile.
Verse 17: Ngingabala onke amathambo ami; bayabukela, bangibuke bengiklibhizela.
Verse 18: Babelana izingubo zami, benzelana inkatho ngesambatho sami.
Verse 19: Kepha wena Jehova mawungabi kude, wena mandla ami, shesha ungisize.
Verse 20: Sindisa umphefumulo wami enkembeni, ukuphila kwami emandleni ezinja.
Verse 21: Ngisindise emlonyeni wengonyama; nasezimpondweni zezinyathi uyangizwa.
Verse 22: Ngiyakushumayeza abafowethu igama lakho, ngikudumise phakathi kwebandla.
Verse 23: Nina enesaba uJehova, mbongeni; nina nonke nzalo kaJakobe, mdumiseni, nimesabe nina nonke nzalo ka-Israyeli.
Verse 24: Ngokuba akadelelanga, akanengwanga yinhlupheko yohluphekayo; akamfihlelanga ubuso bakhe, kepha nalapha ekhala kuye, wezwa.
Verse 25: Kuyakuvela kuwe ukudumisa kwami ebandleni elikhulu; izithembiso zami ngiyakuzigcwalisa phambi kwabamesabayo.
Verse 26: Abamnene bayakudla, basuthe; abafuna uJehova bayakumdumisa; inhliziyo yenu mayiphile kuze kube phakade.
Verse 27: Imikhawulo yonke yomhlaba iyakukhumbula, iphendukele kuJehova, nezizukulwane zonke zezizwe ziyakukhuleka ebusweni bakho.
Verse 28: Ngokuba umbuso ungokaJehova; nguye obusa izizwe.
Verse 29: Bonke abacebileyo bomhlaba bayakudla, bakhuleke; bonke abehlela othulini bayakukhothama phambi kwakhe, naye ongenakugcina umphefumulo wakhe ekuphileni.
Verse 30: Inzalo iyakumkhonza; isizukulwane esizayo siyakulandiswa ngayo iNkosi.
Verse 31: Bayakuza bashumayele ukulunga kwayo kuso isizwe esiyakuzalwa ngokuthi ikwenzile.