Verse 1: Ihubo. Igama lokuvula indlu. ElikaDavide. Ngiyakuphakamisa, Jehova, ngokuba ungikhuphulile; awuvumanga ukuba izitha zami zijabule phezu kwami.
Verse 2: Jehova Nkulunkulu wami, ngakhala kuwe, wangiphilisa.
Verse 3: Jehova, umphefumulo wami uwukhuphulile endaweni yabafileyo, wangiphilisa phakathi kwabashona emgodini.
Verse 4: Dumisani uJehova nina enimkhonzayo, nibonge igama lakhe elingcwele.
Verse 5: Ngokuba ukuthukuthela kwakhe kuba ngokomzuzwana nje, umusa wakhe uba ngowokuphila konke; kusihlwa kungena ukukhala, ekuseni ukujabula.
Verse 6: Mina ngithe ekubuseni kwami: Angisoze nganyakaziswa naphakade.
Verse 7: Jehova, ngomusa wakho ubuwenzile ukuba iqine intaba yami; wabufihla ubuso bakho, ngase ngithuthumela.
Verse 8: Ngakhala kuwe Jehova; nganxusa kuJehova, ngathi:
Verse 9: “Kukhona nzuzoni egazini lami nasekushoneni kwami egebeni na? Uthuli luzakukudumisa yini, lushumayele iqiniso lakho, na?
Verse 10: Yizwa, Jehova, ube nomusa kimi; Jehova, yiba ngumsizi wami.”
Verse 11: Waphendula ukukhala kwami kwaba ngukusina; wangikhumula izingubo zami zokulila, wangembathisa ukujabula,
Verse 12: ukuze umphefumulo wami ukudumise, ungathuli; Jehova Nkulunkulu wami, ngizakukubonga kuze kube phakade.