Verse 1: Ngiyamthanda uJehova, ngokuba uyezwa izwi lokukhuleka kwami.
Verse 2: Ngokuba ubekile indlebe kimi ngiyakukhuleka kuye zonke izinsuku zami.
Verse 3: Izintambo zokufa zangizungeza, nobuhlungu bendawo yabafileyo bangibamba; ngafumana ukuhlupheka nosizi.
Verse 4: Kepha ngabiza igama likaJehova, ngathi: “Ngiyakuncenga, Jehova, khulula umphefumulo wami.”
Verse 5: Unomusa uJehova, ulungile; uNkulunkulu wethu unobubele.
Verse 6: UJehova uyalondoloza ongenabuqili; ngithotshisiwe phansi wangisindisa.
Verse 7: Buyela ekuphumuleni kwakho, mphefumulo wami, ngokuba uJehova ukuphathe ngomusa.
Verse 8: Yebo, ukhululile umphefumulo wami ekufeni, amehlo ami ezinyembezini, nezinyawo zami ekuweni.
Verse 9: Ngiyakuhamba ebusweni bukaJehova ezweni labaphilayo.
Verse 10: Ngiyakholwa, ngalokho ngiyakhuluma; ngahlushwa kakhulu.
Verse 11: Ngathi osizini lwami: “Bonke abantu banamanga.”
Verse 12: Ngiyakubuyiselani kuJehova ngazo zonke izenzo zakhe ezinhle kimina na?
Verse 13: Ngiyakuthatha indebe yensindiso, ngibize igama likaJehova.
Verse 14: Izithembiso zami kuJehova ngiyakuzigcwalisa, yebo, nasebusweni babantu bakhe bonke.
Verse 15: Kuyigugu emehlweni kaJehova ukufa kwabangcwele bakhe.
Verse 16: Ngiyinceku yakho impela, Jehova; ngiyinceku yakho, indodana yencekukazi yakho; uthukululile izintambo zami.
Verse 17: Ngiyakunikela kuwe umnikelo wokubonga, ngibize igama likaJehova.
Verse 18: Izithembiso zami kuJehova ngiyakuzigcwalisa yebo, nasebusweni babantu bakhe bonke,
Verse 19: emagcekeni endlu kaJehova, phakathi kwakho, Jerusalema. Haleluya!