Verse 1: ElikaDavide. Jehova, ngiphakamisela kuwena umphefumulo wami.
Verse 2: Nkulunkulu wami, ngiyethemba kuwe; mawungangijabhisi; izitha zami mazingethabi ngami.
Verse 3: Yebo, akuyikujabha noyedwa kwabakulindelayo; bayakujabha abaphambuka ngeze.
Verse 4: Ngazise imendo yakho, Jehova; ngifundise izindlela zakho.
Verse 5: Ngihambise eqinisweni lakho, ungifundise, ngokuba wena unguNkulunkulu wensindiso yami; ngilindela wena usuku lonke.
Verse 6: Khumbula, Jehova, ububele bakho nomusa wakho, ngokuba kukhona kwaphakade.
Verse 7: Ungazikhumbuli izono zobusha bami neziphambeko zami; ngikhumbule ngokomusa wakho ngenxa yobubele bakho, Jehova.
Verse 8: UJehova muhle, ulungile; ngalokho ufundisa izoni indlela.
Verse 9: Abathobekileyo ubaholela kokulungileyo, abathobekileyo ubafundisa indlela yakhe.
Verse 10: Zonke izindlela zikaJehova zingububele neqiniso kulabo abagcina isivumelwano sakhe nezifakazelo zakhe.
Verse 11: Ngenxa yegama lakho, Jehova, ngithethelele ukona kwami, ngokuba kukhulu.
Verse 12: Ngumuphi umuntu omesaba uJehova na? Nguyena oyakufundiswa nguye indlela ayakuyikhetha.
Verse 13: Umphefumulo wakhe uzakuhlala ngokwenama, inzalo yakhe iyakuzuza izwe.
Verse 14: Ubuhlobo bukaJehova bukubo abamesabayo; uyakubazisa isivumelwano sakhe.
Verse 15: Amehlo ami akuye uJehova njalo, ngokuba nguyena okhipha izinyawo zami enetheni.
Verse 16: Phendukela kimi, ube nomusa kimi, ngokuba nginesizungu, ngihluphekile.
Verse 17: Izinsizi zenhliziyo yami zikhulile; ngikhiphe ezinhluphekweni zami.
Verse 18: Bheka ukuhlupheka kwami nosizi lwami, ungithethelele zonke izono zami.
Verse 19: Bheka izitha zami, ngokuba ziningi; ziyangizonda ngenzondo yonya.
Verse 20: Londoloza umphefumulo wami, ungikhulule; mawungangijabhisi, ngokuba ngiphephela kuwe.
Verse 21: Ukulunga nobuqotho makungilondoloze, ngokuba ngilindele wena.
Verse 22: Nkulunkulu, hlenga u-Israyeli kuzo zonke izinkathazo zakhe.