Verse 1: Yena owakhile ekusithekeni koPhezukonke nohlezi emthunzini kaSomandla
Verse 2: uthi kuJehova: “Uyisiphephelo sami nenqaba yami noNkulunkulu wami engimethembayo.”
Verse 3: Ngokuba yena uyakukhipha ogibeni lomcuphi nasobhadaneni olubhubhisayo.
Verse 4: Ngezimpaphe zakhe uyakukusibekela, uphephele phansi kwamaphiko akhe; ukuthembeka kwakhe kuyisihlangu nehawu.
Verse 5: Awuyikwesaba ivuso lasebusuku, nomcibisholo ondizayo emini,
Verse 6: nobhadane oluhamba ebumnyameni, nesifo esibhubhisayo emini enkulu.
Verse 7: Bayakuwa abayizinkulungwane ngaseceleni kwakho, nabayizinkulungwane eziyishumi ngakwesokunene sakho, kepha akuyikufinyelela kuwe.
Verse 8: Uyakubuka nje ngamehlo akho, ubone ukuphindiselwa kwababi,
Verse 9: ngokuba uthi: Jehova, uyisiphephelo sami; oPhezukonke umenzile abe yinqaba yakho.
Verse 10: Awuyikwehlelwa ngokubi, nesifo asiyikusondela etendeni lakho.
Verse 11: Ngokuba uyakuyaleza izingelosi zakhe ngawe, zikulondoloze ezindleleni zakho zonke.
Verse 12: Ziyakukuthwala ngezandla, ungaqhuzuki ngonyawo lwakho etsheni.
Verse 13: Uyakunyathela ingonyama nebululu, unyathele phansi ibhongo lengonyama nodrako.
Verse 14: Ngenxa yokuba enamathele kimi, ngakho ngiyamkhulula; ngiyamphakamisa ngokuba elazi igama lami.
Verse 15: Uyakungibiza, ngimphendule; ngiyakuba naye esosizini, ngimkhulule, ngimdumise.
Verse 16: Ngiyakumsuthisa ngobude bezinsuku, ngimbonise insindiso yami.