Verse 1: Ihubo. Igama losuku lwesabatha. Kuhle ukumbonga uJehova nokuhubela igama lakho wena oPhezukonke;
Verse 2: ukushumayela umusa wakho ekuseni nokuthembeka kwakho ebusuku,
Verse 3: ngokubetha ugubhu olunezintambo eziyishumi, nomqangala, kanye nehabhu elizwakala kamnandi.
Verse 4: Ngokuba ungithokozisile, Jehova, ngezenzo zakho; ngiyakumemeza ngokujabula.
Verse 5: Yeka ubukhulu bezenzo zakho, Jehova. Imicabango yakho ijulile kakhulu.
Verse 6: Umuntu oyisilima angekucabange, nesiwula asikuboni.
Verse 7: Noma ababi behluma njengotshani, nezigangi noma ziqhakaza zonke, kuyenzeka ukuba babhujiswe kuze kube phakade.
Verse 8: Kepha wena Jehova uphakeme kuze kube phakade.
Verse 9: Ngokuba bheka, izitha zakho, Jehova, bheka, izitha zakho, ziyakubhubha; bonke abenza okubi bayakuhlakazwa.
Verse 10: Kepha uphondo lwami uyaluphakamisa njengolwenyathi, ngigcotshwa ngamafutha amasha.
Verse 11: Iso lami liyakubona ngokujabula izitha zami, nezindlebe zami ziyakuzwa ngokuthokoza ngababi abangivukelayo.
Verse 12: Olungileyo uyahluma njengesundu, uyakhula njengomsedari eLebanoni.
Verse 13: Batshaliwe endlini kaJehova, bamila emagcekeni kaNkulunkulu wethu.
Verse 14: Nasebudaleni bayakuthela izithelo, bahlume babe luhlaza,
Verse 15: ukuze bashumayele ukuthi uJehova ulungile; uyidwala lami okungekho kuye ukungalungi.